7 000 metr bıiktikte qalǵan reseılik alpınıstti bir aptadan beri qutqara almaı jatyr
ASTANA. KAZINFORM — 47 jastaǵy reseılik alpınıst Natalıa Nagovıtsynanyń 12 tamyzda aıaǵy synyp, sodan beri Qyrǵyzstandaǵy Jeńis shyńynyń tóńireginde (7439 m bıiktikte) qalyp qoıǵany belgili boldy, dep habarlaıdy DW.
Onyń janyndaǵy serigi alǵashqy medıtsınalyq kómegin kórsetip, kómek izdep ketken. Kelesi kúni eki sheteldik alpınıst onyń evakýatsııasyn úılestire almaǵandyqtan ony uıyqtaıtyn qapshyqpen (spalnyı meshok) orap, sol jerde qaldyrǵan.
Qazirgi ýaqytta onyń azyq-túligi joq, aýyzsýy da az kórinedi. Mash taýdan ushyp ótip jatqan dronnan túsirilgen vıdeony jarııalady. Osy vıdeoǵa súıene otyryp, qutqarýshylar onyń tiri ekenin jáne jyrtylǵan shatyrdyń ishinde jatqanyn anyqtady. Biraq rolık qashan túsirilgeni kórsetilmegen.
REN telearnasynyń suhbatshysy, Qyrǵyzstannyń Tótenshe jaǵdaılar mınıstrliginen, Natalıaǵa sońǵy ret jetýge 16 tamyzda tyrysqanyn aıtty. Qıyn aýa raıy sebepti tikushaq apatty jaǵdaıda qonýǵa májbúr boldy. Ekıpaj músheleri jaraqat alyp, olardy ekinshi tikushaqpen evakýatsııalaý kerek boldy. Al eldiń Qorǵanys mınıstrligi «Interfaks» agenttigine bergen málimetinde, alpınıstti qutqarýdyń sońǵy áreketi 17 tamyzda bolǵanyn habarlady.
Kelesi ret Natalıaǵa kómek kórsetýge 20 tamyzda attanady. Qorǵanys mınıstrliginiń eki tikushaǵy qazir ushýǵa daıyn tur, biraq aýa raıynyń qolaısyzdyǵynan — kúshti qar jaýýy men kórinis nashar bolǵandyqtan usha almaı jatyr. Vedomstvodan habarlaǵandaı, 11 tamyzdan beri Qyrǵyzstan taýlaryna órmeleý kezinde eki reseılik azamat jáne bir ıtalııalyq azamat qaza taýyp, taǵy bir reseılik pen bir nemis azamaty jaraqat aldy.
Natalıanyń kúıeýi Sergeı Nagovıtsyn 2021 jyldyń jazynda Qyrǵyzstandaǵy Han-Teńgrı shyńynda qaıtys boldy. 6900 metr bıiktikte alpınıstke ınsýltke ushyrady. Onyń qasynda bolǵan jubaıy qutqarýshylardyń aıtqandaryn tyńdamaı, kúıeýinsiz tómen túspeýge sheshim qabyldady. Sońynda Sergeı qaza tapty, al Natalıany qutqaryp qaldy. Bir jyldan keıin ol qaıtadan Han-Teńgrıge shyǵyp, kúıeýine arnap eskertkish taqtaısha ornatty. Alpınıst ári rejısser Dmıtrıı Sınıtsın bul týraly «Han-Teńgrıde qalý» atty derekti fılm túsirgen.
Osydan buryn Qyrǵyzstanda Jeńis shyńy mańynda Qorǵanys mınıstrligine tıesili Mı-8 tikushaǵy (bort nómiri 205) bıik taýly aımaq pen kúrdeli meteojaǵdaıda apatty jaǵdaıda qonýǵa májbúr bolǵany habarlandy.