700 myń qazaqstandyq elektrondy tsıfrlyq qoltańbany onlaın túrde aldy
NUR-SULTAN. QazAqparat –Halyqqa qyzmet kórsetý ortalyqtarynyń (HQKO) karantın jaǵdaıyndaǵy jumysy, ondaǵy búgingi problemalar men onyń sheshimi týraly QazAqparat tilshisine «Azamattarǵa arnalǵan úkimet» memlekettik korporatsııasynyń basqarýshy dırektory Murat Jumanbaı aıtyp berdi.
«Karantın jaǵdaıyna baılanysty bizdiń korporatsııanyń kóptegen qyzmetterin qalyń kópshilik onlaın túrde alyp jatyr. ıAǵnı, olarda úıde otyryp, elektrondy túrde ótinish qaldyryp, qajetti qyzmetti alý múmkindigi bar. Osy turǵyda «Ulttyq aqparattyq tehnologııalar» AQ elektrondy tsıfrlyq qoltańbany onlaın túrde alýǵa múmkindik jasady. Sońǵy 2 aıdyń ishinde 700 myń qazaqstandyq elektrondy tsıfrlyq qoltańbany onlaın túrde aldy. Halyqqa qyzmet kórsetý ortalyqtaryndaǵy halyq jıi tutynatyn ekinshi qyzmet túri ol qujattandyrý. Onyń ishinde merziminiń bitýine baılanysty jeke kýálikti nemese kólik tólqujatyn aýystyrý. Sondaı-aq, jaz mezgili bolǵandyqtan avtomobıl kólikterin tirkeý jáne rásimdeý qyzmeti turǵyndar arasyndaǵy eń kóp suranysqa ıe qyzmet bolyp otyr», - dedi Murat Jumanbaı.
Sondaı-aq, basqarýshy dırektor halyqqa qyzmet kórsetý ortalyqtarynyń jumysyna qatysty azamattardan kelip túsetin shaǵymdar týraly aıtyp ótti.
«Ózińiz biletindeı, karantın kóp jaǵdaıǵa shekteý engizdi. Buryn azamattarymyz qyzmetter men anyqtamalardy halyqqy qyzmet kórsetý ortalyǵyna tikeleı kelip alatyn. Qazir ortalyqqa kelýdiń qajeti joq, bárin onlaın túrde alýǵa bolady. Osy turǵyda keıbir azamattar tarapynan túsinispeýshilik týyndap, nege ózimiz kelip almaımyz degen suraqtar qoıylyp, shaǵymdar kelip tústi. ıAǵnı bastapqyda halyqqa onlaın túrde qyzmet alýdy úıretýde kedergiler týyndady. Ýaqyt óte kele halyq onyń tıimdi ekenin túsindi. Ekinshi másele, HQKO-daǵy kezekti brondaýǵa qatysty bolyp otyr. Degenmen bul problema negizinen mamandandyrylǵan halyqqa qyzmet kórsetý ortalyǵynyń jumysyna qatysty. Al jalpy HQKO-da kezek problemasy joq. Mamandandyrylǵan halyqqa qyzmet kórsetý ortalyǵynyń taǵy bir problemasy ol deldaldyq. Bul poblema ásirese zańsyz jumys isteıtin saqtandyrý kompanııalaryna qatysty bolyp otyr. Olar syrttan HQKO-na kelgen adamdardy ańdyp turyp, óz qyzmetterin usynyp, paıda tabady. Biz osy problemany joıý úshin mamandandyrylǵan HQKO-da óz-ózine qyzmet kórsetý alańyn ashtyq. Ol jerde kompıýter men mamandardan keńes alý qyzmeti qarastyrylǵan. Ótken aptada quqyq qorǵaý organynyń ókilderi «óz qyzmetterin» usynǵan 4 deldaldy ákimshilik jaýap tartty», - dedi ol.
Buǵan deıin QR Sybaılas jemqorlyqqa qarsy is-qımyl agenttigi tarapynan HQKO-nyń jumysyna qatysty shaǵymnyń kóptep túsip jatqandyǵyn habarlaǵan bolatynbyz.
Odan bólek, elordadaǵy mamandandyrylǵan halyqqa qyzmet kórsetý ortalyǵyndaǵy uzyn-sonar kezekke qatysty basshylyq túsinikteme berdi.
