700 munaıshy Kaspıı teńizindegi jasandy araldarda daýys beredi
ATYRAÝ. QazAqparat - Atyraý oblysynda munaı-gaz salasynda qyzmet etetin 12 000 qazaqstandyq saılaýǵa qatysady, dep habarlady oblystyq saılaý komıssııanyń múshesi Ásııa Qystaýbaeva.
Basqa aımaqta turatyn, biraq saılaý kúni Atyraý oblysynda vahtalyq aýysymda bolatyn qazaqstandyqtar shyǵarý kýálikteri arqyly daýys bere alady. Sondaı-aq, aldyn ala aýdan ákimi atyna ótinish bildirip, tizimge engizilgenderdiń de daýys berýge múmkindigi bar. Vahtalyq aýysym boıynsha kóp daýys berýshiler Teńiz ken ornynda. Onda 9 myńǵa jýyq adam bar. 26 sáýir kúni tańerteń kólik uıymdastyrylyp, olardy jaqyn mańdaǵy saılaý ýchaskesine jetkizedi. «Bolashaq» zaýytynda barlyǵy 2300 qazaqstandyq jumys jasaıdy. Olar Talǵaıran aýylyndaǵy №77 jáne Aqsaı aýyldyq okrýgindegi №55 saılaý ýchaskesinde daýys beredi, olardy avtobýspen aparady», - dedi Á.Qystaýbaeva.
Onyń aıtýynsha, Kaspıı teńizindegi 5 jasandy: «D», «A», EPC-2, ERS-3 ı ERS-4 araldaryndaǵy 700-ge jýyq qazaqstandyq jumysshy sol aralda daýys beretin bolady.
«Atyraý qalasynyń №43 saılaý ýchaskesi komıssııa músheleri iri jasandy «D» aralynda daýys berýdi ótkizse, №39-shi saılaý ýchaskesiniń komıssııa músheleri qalǵan tórt aralda ótkizedi. Saılaý komıssııasy músheleri men saılaý jáshigin aralǵa tikushaqpen jetkizedi», - dedi Á.Qystaýbaeva.
