700 mln teńge jymqyrǵan: Shymkentte Ál-Farabı aýdany ákiminiń apparat jetekshisi sottaldy
ASTANA. KAZINFORM – Shymkent qalasynyń qylmystyq ister jónindegi aýdanaralyq sotynda kezekti qylmystyq is qaraldy.
Atap aıtsaq, M. Esimdi azamat qyzmet babyn paıdalana otyryp asa iri mólsherde senip tapsyrylǵan múlikti bir top adammen aldyn ala sóz baılasý arqyly ysyrap etken (QK-niń 189-baby 4-bóligi 2-tarmaǵy).
Al, sybaılastary K. men B.-ǵa asa iri mólsherde bótenniń múlkin bir top adammen urlaý, asa iri mólsherde salyq tóleýden jaltarý jáne qujattardy qoldan jasaý sııaqty aıyptar (QK-niń 189-baby 4-bóligi 2-tarmaǵy), 28-baby 3-bóligi - 245-baby 2-bóligi 1, 2-tarmaqtary), 385-baby 2,3-bólikteri) taǵyldy.
Sot materıaldaryna kóz júgirtsek, M. 2019 jyly Shymkent qalasy Ál-Farabı aýdany ákimi apparatynyń basshysy bolǵan ýaqytta qyzmet babyn paıdalana otyryp, aldyn ala sóz baılasý arqyly JShS dırektory B. jáne quryltaıshysy K. birge qylmystyq maqsatta ákimdiktiń bıýdjet qarajatyn jymqyrýdy oılastyrǵan.
Atap aıtsaq, olar turǵyn úı aýlalaryn abattandyrýǵa arnalǵan smetalyq qujattardaǵy (qoqys jáshikteri, shaǵyn kúrkeler, oryndyqtar, oıyn jáne jattyǵý alańdary) materıaldardyń qunyn óz baǵasynan asyra otyryp ázirlep, shamamen 700 mln teńge kóleminde senip tapsyrylǵan múlikti ysyrap etken.
K. uıymdastyrýshy retinde B.-men birge deklaratsııalarǵa burmalanǵan derekterdi engizý arqyly salyq tóleýden jaltarýdy uıymdastyryp, memleketke 194 mln teńgeden astam zııan keltirgen.
Sonymen qatar, B. salyq organdary aldyndaǵy qaryzyn jasyrý maqsatynda 130 mln teńgeden astam somaǵa bank kepildigin jasaý úshin bank fırmalyq blankin qoldan jasaǵan.
Osyndaı faktilerdi alǵa tartqan prokýror sottalýshylarǵa 8 jyl bas bostandyǵynan aıyrý jazasyn taǵaıyndaýdy surady. Al, jábirlenýshilerdiń ókilderi zańǵa sáıkes jaza taǵaıyndalsa, sol ádil sheshim bolatynyn jetkizdi.
Sottalýshylar bolsa, óz kinálaryn moıyndamaı, sottan ózderin aqtaýdy surady.
Aıta keteıik, zań boıynsha sybaılas jemqorlyq qylmysy úshin negizgi jaza retinde 7 jyldan 12 jylǵa deıingi merzimge bas bostandyǵynan aıyrý kózdelgen.
Sottalýshylardyń kinási sotta zerttelgen dáleldermen dáleldendi. Sot jeńildetetin mán-jaılardy eskere otyryp – kámeletke tolmaǵan balalarynyń bolýyna baılanysty, árqaısysyna qylmystyq quqyq buzýshylyqtardyń jıyntyǵy boıynsha 8 jyl bas bostandyǵynan aıyrý jazasyn taǵaıyndap, M.-ny ómir boıyna memlekettik qyzmette laýazymdardy atqarý quqyǵynan aıyrdy.
