700 myńǵa deıin aqsha alǵan: shekaradan adamdardy zańsyz ótkizgen qylmystyq top ustaldy

QONAEV. KAZINFORM – Almaty oblysy krımınaldyq polıtsııa basqarmasy qyzmetkerleri Qazaqstanǵa zańsyz mıgratsııa uıymdastyrǵan qylmystyq toptyń áreketin toqtatty.

Oblystyq polıtsııa deparamentiniń málimetinshe, zańsyz arnanyń uıymdastyrýshylary shetel azamattary bolǵan. Kúdiktiler shetel azamattarynyń elge zańsyz kirýin jáne zańdastyrylýyn qamtamasyz etip otyrǵan. Óz qyzmetteri úshin olar ár mıgranttan 150 myńnan 700 myń teńgege deıin aqsha alǵan. 

– Arnaıy is-shara barysynda kúdiktilerden ondaǵan sheteldik pasport, medıtsınalyq saqtandyrý polısteri, qoldan jasalǵan qujattar, sondaı-aq esirtki zattary men dinı kitaptar tárkilendi. Qylmystyq toptyń barlyq múshesi quryqtalyp, ýaqytsha ustaý ızolıatoryna qamaldy, - dep habarlady departamentten.

Atalǵan derek boıynsha zańsyz mıgratsııany uıymdastyrý, alaıaqtyq jáne esirtki zattaryn zańsyz saqtaý baptary boıynsha alty qylmystyq is qozǵaldy.

Qazirgi ýaqytta sotqa deıingi tergeý júrgizilip jatyr.

Eske salaıyq, shildede shekarada 4,7 myń zań buzýshy ustaldy.