700 myń jas áskerı-patrıottyq tárbıege tartyldy

ASTANA. KAZINFORM — QR Qorǵanys mınıstriniń orynbasary Asqar Mustabekov Májiliste jastardy áskerı-patrıottyq tárbıeleý júıesin damytý baǵytynda atqarylyp jatqan jumystar týraly baıandady.

2025 jylǵy zańnamalyq ózgerister negizinde Qorǵanys mınıstrligi janynan áskerı-patrıottyq tárbıe jónindegi respýblıkalyq úılestirý keńesi qurylǵan.

— Bul keńes atalǵan saladaǵy jumysty úılestirýge, onyń tıimdiligin arttyrýǵa jáne negizgi baǵyttaryn aıqyndaýǵa múmkindik berdi, — dedi A. Mustabekov.

Onyń aıtýynsha, búginde bul júıe óńirlik deńgeıde de tolyq iske qosylǵan.

— Qazirgi tańda elimizdiń barlyq óńirinde 20 aýmaqtyq úılestirý keńesi jumys isteıdi. Bul áskerı-patrıottyq tárbıeni jergilikti deńgeıde júıeli júrgizýge múmkindik berdi, — dedi vıtse-mınıstr.

Jastardy qamtý aýqymy aıtarlyqtaı keńeıgen.

— Áskerı-patrıottyq úıirmeler men synyptarǵa 380 myńnan astam bala qatysady. Al alǵashqy áskerı daıarlyq pánimen 450 myńǵa jýyq oqýshy qamtylǵan. Jalpy bul baǵyttaǵy jumystarmen 700 myńǵa jýyq jas qamtylyp otyr, — dedi ol.

Sonymen qatar, júıeni sapalyq turǵydan jetildirý baǵytynda naqty sharalar qabyldanǵan.

— Áskerı kafedralardyń oqý baǵdarlamalary qaıta qaralýda. Dalalyq sabaqtardyń sapasyn arttyrý jáne alǵashqy áskerı daıarlyq páni muǵalimderin irikteý tártibi jańartyldy, — dedi Asqar Mustabekov.

Aıta keteıik, buǵan deıin Memleket basshysy áskerı-patrıottyq tárbıe júıesin jetildirýge baǵyttalǵan zańǵa qol qoıǵan bolatyn.