700 qazaqstandyq Sırııa men Irak bosqyndar lagerinen qaıtarylǵan
Búgin Tashkentte ShYU-ǵa qatysýshy elder Іshki ister mınıstrleriniń keńesi ótti. Onlda QR Іshki ister mınıstri Marat Ahmetjanov Shanhaı yntymaqtastyq uıymyna qatysýshy elderge transulttyq jáne kıberqylmyspen kúreske qatysty naqty usynystar jasady.
«Qazaqstan tarapy óz usynystaryn engizdi. Búginde esirtki trafıgine, «Shyrmaýyq» operatsııasyn júzege asyrý aıasynda birlesip jedel izdestirý is-sharalaryn qabyldaýǵa qatysty máseleler bar. Óıtkeni, búginde elderimiz arqyly Eýropaǵa Aýǵanstannan geroın trafıgi bar ekenin bilemiz. Buǵan qosa sıntetıkalyq esirtki máselesi de erekshe alańdaýshylyq týdyryp otyr. Búgin áriptesterimizben jedel aqparat almasý, qylmystyń osy túrin aýyzdyqtaý úshin batyl is-sharalar qabyldaý jaıyn talqyladyq. Buǵan qosa, kıberqylmysqa, ınternet-alaıaqtyqqa qatysty usynys engizdik. Ásirese, sońǵy pandemııa jaǵdaıynda ınternet-alaıaqtyq alańdaýshylyq týdyryp otyr. Óıtkeni, onyń shekarasy joq», - dedi Qazaqstan mınıstri keńesten keıin BAQ ókilderine suhbatynda.
Polisia.kz portaly mınıstr keńes barysynda Qazaqstannyń terrorızmge qarsy barlyq 19 halyqaralyq konventsııalar men hattamalarǵa qosylǵanyn atap ótken. Kópjaqty jáne ekijaqty yntymaqtastyq formatynda qylmysqa qarsy kúres boıynsha 90-nan astam shart jasalǵan. Sondaı-aq qarýly qaqtyǵystarǵa qatysý úshin «ystyq núktelerge» barýdy josparlaǵan azamattar anyqtalyp jatyr (2019 jáne 2021 jyldary 700 qazaqstandyq Sırııa men Irak bosqyndar lagerinen qaıtaryldy). Esirtki qylmysyna qarsy kúreste sońǵy bir jarym jyl ishinde sıntetıkalyq esirtki óndiretin 40 esirtki zerthanasy joıyldy. Ulttyq baqylaýda – esirtkiniń myńnan astam jańa túri. Internettegi jarnama aýyr jáne asa aýyr qylmystar sanatyna jatqyzyldy.
«Keńes aıasynda Marat Ahmetjanov áriptesterimen ekijaqty kelissózder júrgizedi. Shaǵyn formatta elimizdiń ishki ister mınıstri qylmysqa qarsy birlesken kúresti talqylaıdy. Kezdesý qorytyndysy boıynsha keńes hattamasyna qol qoıyldy», - delingen portalda.
Foto: polisia.kz
