700-ge jýyq kásiporyn basshysynyń shetelge shyǵýyna shekteý qoıylýy múmkin
ASTANA. KAZINFORM — Qazaqstanda salyq bereshegine baılanysty 700-ge jýyq jeke kásipker men kásiporyn basshysynyń shetelge shyǵýyna ýaqytsha shekteý qoıylýy múmkin. Bul týraly Memlekettik kirister komıtetiniń Bereshekpen jumys basqarmasynyń basshysy Qaısar Aryn málimdedi.
Onyń aıtýynsha, bıyl 1 shildeden bastap iri kólemde salyq qaryzy bar kásiporyn basshylarynyń elden shyǵýyn shekteýge múmkindik beretin jańa tártip kúshine endi.
— 1 qazannan bastap sotqa júgine bastadyq. Qazir respýblıka boıynsha mundaı shekteý qoldanylýy múmkin 700-ge jýyq jeke kásipker men zańdy tulǵanyń basshysy bar. Bereshekti óndirip alý jumystarynyń nátıjesinde olardyń sany azaıýy múmkin. Aldaǵy kúnderi shekteý qoıa bastaımyz, — dedi Qaısar Aryn.
Jańa tártip boıynsha salyq bereshegi 27 myń aılyq eseptik kórsetkishten, ıaǵnı 116,7 mln teńgeden assa jáne qaryz úsh aıdan astam ýaqyt ótelmese, kásiporyn basshysynyń Qazaqstannan shyǵýyna ýaqytsha tyıym salynýy múmkin.
— Bul somany eseptegende negizgi qaryzben birge ósimpul men aıyppul da eskeriledi. Alaıda salyq organy mundaı shekteýdi óz betinshe qoıa almaıdy. Ol úshin aldymen sotqa júginip, ruqsat alýy qajet. Sot kelisim bergennen keıin ǵana shekara qyzmetine tıisti qujat joldanady, — dedi ol.
Qaısar Arynnyń túsindirýinshe, jańa talap jeke kásipkerlerge, zańdy tulǵalar men olardyń qurylymdyq bólimsheleriniń birinshi basshylaryna qatysty. Al kompanııa quryltaıshylaryna qoldanylmaıdy.
Qaryz tolyq ótelgennen keıin shekteýdi alyp tastaýǵa bolady. Biraq ol úshin de sottyń ruqsaty qajet. Sondyqtan azamat bereshegin áýejaıda tólegen kúnniń ózinde birden shetelge usha almaıdy. Bul rásimge bir jumys kúni qajet bolýy múmkin.
Buǵan deıin 20 qazanǵa deıin qandaı salyqtar men mindetti tólemderdi tóleý qajet ekenin jazǵan edik.
