700-den astam aýyl balasy «IQanat» aıasynda grantqa talasady
NUR-SULTAN. QazAqparat - «IQanat» olımpıadasynyń qorytyndy týryna elimizdiń ár óńirinen kelgen 9 synyptaǵy 701 bala qatysty, dep habarlaıdy QazAqparat tilshisi.
Oqýshylar barlyq oblystaǵy 162 aýdannan keldi. Bul balalar - aýyl mektepterindegi 30 myń oqýshynyń úzdikteri.
«Bul baǵyttaǵy qadamdar bıznes pen memleket yntymaqtastyǵy negizinde iske asyrylýda. Osy oraıda bıznes bilim berý jobalaryn iske asyrýǵa óz úlesin qosyp jatqanyna qýanyshtymyn. Sonymen qatar, «IQanat-tyń» aýyl balalaryn oqytýǵa baǵyttalǵany mańyzdy bolyp otyr. Sebebi mektepterdiń negizgi bóligi aýylda ornalasqandyqtan, bul rette túrli jaǵdaılarǵa baılanysty olarǵa ózderiniń áleýetin júzege asyrý qıyndaý bolady», - dedi QR Bilim jáne ǵylym vıtse-mınıstri Bıbigúl Asylova.
Onyń sózine qaraǵanda, osyndaı jobalardy mınıstrlik aldaǵy ýaqytta erekshe qoldaıtyn bolady.
«Joba daryndy balalardy anyqtaýǵa kómek kórsetip keledi. Mundaı jobalardy qoldaýdy jalǵastyramyz, sondyqtan bıznespen birlesken josparlar az emes. Atap aıtqanda, bilim salasynda memlekettik-jekeshelik áriptestik aıasynda zańnamalyq sharalar qabyldanýda», - dedi vıtse-mınıstr.
Olımpıada matematıka, fızıka, aǵylshyn tili jáne esse konkýrsy boıynsha baǵyttardy qamtyp otyr. Qatysýshylardyń 225-i esse jazýda, 202-si aǵylshyn tilinen, 149 bala matematıkadan jáne 136 oqýshy fızıka páninen ózara básekege túsedi.
Osy sharanyń nátıjesi 4 shilde kúni jarııalanbaq jáne osy kúni jeńimpazdar marapattalady. 4 pán boıynsha 12 jeńimpaz UBT-ny tapsyrýǵa jáne grantqa joǵary oqý ornyna túsýge jan-jaqty daıyndyqtyń biregeı múmkindigine ıe bolady. Budan bólek, QR Tuńǵysh Prezıdenti - Elbasy qory qamtyp otyrǵan 100 granttyń ıegeri anyqtalady. Bul balalar 2020 jyly Býrabaıda ashylatyn «IQanat Kazakh-English High School» mektebinde oqý múmkindigin alady.
