700 baǵdarlama jabylady: Qazaqstanda joǵary bilim júıesi jańarady
ASTANA. KAZINFORM — Qazaqstanda joǵary bilim berý júıesine aýqymdy ózgerister engizilip, oqý baǵdarlamalary qaıta qaralady. Bul týraly Ǵylym jáne joǵary bilim mınıstri Saıasat Nurbek málimdedi.
Mınıstrdiń aıtýynsha, bilim berý sapasyn arttyrý baǵytynda naqty sharalar qolǵa alynǵan. Sonyń biri — bilim mazmunyn eńbek naryǵynyń suranysyna beıimdeý.
— «Jańa mamandyqtar atlasy» jobasy aıaqtaldy. Endi ár óńirde eńbek naryǵyna qajetti mamandyqtar aıqyndaldy. Soǵan sáıkes 8 myńnan astam bilim berý baǵdarlamasy qaıta qaralady. Onyń shamamen 700-i jabylady, — dedi ol.
Mınıstr bul sheshimder naqty suranysqa negizdelgenin atap ótti.
— 73 myńǵa jýyq kásiporynǵa saýalnama júrgizildi. Sonyń nátıjesinde ár óńir men sala boıynsha kadrlarǵa degen qajettilik anyqtaldy. Endi bilim berý mazmuny osy derekterge sáıkes jańartylady, — dedi Saıasat Nurbek.
Sonymen qatar ınjenerlik bilim berý júıesine de ózgerister engiziledi.
— Injener mamandardy daıarlaıtyn joǵary oqý oryndary praktıkalyq oqytýǵa kóshedi. Mysaly, Atyraý munaı jáne gaz ýnıversıtetinde stýdentter óndiriste tájirıbeden ótip, naqty jumys úderisine qatysady, — dedi mınıstr.
Budan bólek, sheteldik ýnıversıtet fılıaldaryna beriletin grant quny da qaıta qaralady.
— Bul baǵytta Qarjy mınıstrligimen birlesip jumys júrgizilip jatyr. Sheteldik ýnıversıtetterdiń oqý quny ártúrli bolǵandyqtan, bul másele jeke qarastyrylady. Sonymen qatar olardyń oqytýshylarynyń keminde 30–40%-y negizgi ýnıversıtetten kelýi tıis, — dedi ol.
Mınıstrdiń aıtýynsha, barlyq ózgerister osy jyldyń ishinde qabyldanyp, jańa oqý jylyna deıin iske asyrylady.
Buǵan deıin Májilis depýtaty agrarlyq mamandyq stýdentteriniń shákirtaqysyn kóterýdi usynǵan edi.
