700 adam kóshirilip, myńnan astam tehnıka daıyndaldy: Aqmola oblysy sý tasqynyna daıyn ba
ASTANA. KAZINFORM - Qanat Bozymbaev Aqmola oblysyna eki kúndik jumys saparymen kelip, óńir basshysy Marat Ahmetjanovpen birge Astrahan, Shortandy, Arshaly, Tselınograd jáne Atbasar aýdandaryndaǵy tasqynǵa qarsy is-sharalardyń oryndalýyn tekserdi.
Úkimettiń baspasóz qyzmetiniń habarlaýynsha, sapardyń alǵashqy kúni Premer-mınıstrdiń orynbasary Arshaly aýdanynyń Jibek joly aýylyndaǵy uzyndyǵy 6,3 shaqyrymdy quraıtyn jańa qorǵanys dambasyn qarap shyqty. Bul nysan kóp jyldan beri ózekti bolyp kelgen sý tasqyny máselesin sheshýge múmkindik berip, jalpy sany 15 myń adam turatyn jaqyn mańdaǵy eldi mekenderdi qorǵaýdy qamtamasyz etedi.
Shortandy aýdanynda «Damsınskaıa» bógetine jóndeý jumystary júrgizildi. Munda shlıýz-qaqpalarǵa rekonstrýktsııa júrgizilip, Damsa ózeni arqyly ótetin 5 mln tekshe metrge deıin sý kólemin retteýge múmkindik jasaldy. Bul Damsa, Shortandy, Stepnoe jáne Naýchnyı aýyldaryn sý basý qaýpinen qorǵaýǵa baǵyttalǵan.
Ekinshi kúni Qanat Bozymbaev Atbasar qalasyndaǵy Jabaı ózeniniń arnasyn tazartý jáne qorǵanys úıindisin turǵyzý jumystarymen tanysty. Búgingi tańda ózenniń 7,2 shaqyrym ýchaskesi tazartyldy. Qazirgi ýaqytta arnany tereńdetý, keńeıtý jáne túzeý jumystary jalǵasýda, sondaı-aq qala mańynda qorǵanys dambasy salynýda.
Sonymen qatar «Atbasar – Sochınskoe» avtojoly boıynda jyl saıyn sý basý qaýpi tónetin aýmaqta jańa avtomobıl kópiriniń qurylysy aıaqtaldy. Bul Atbasar aýdanyndaǵy tórt eldi mekenniń 2 myń turǵyny úshin tasqyn kezeńinde kólik qatynasynyń úzilý máselesin sheshýge múmkindik berdi.
Budan keıin Premer-mınıstrdiń orynbasary Astrahan aýdanyndaǵy Eski Qalqutan aýyly mańyndaǵy Qalqutan ózeniniń arnasyn túzeý, tazartý jáne tereńdetý jumystarymen tanysty. Bıyl uzyndyǵy 20,8 shaqyrymdy quraıtyn Qalqutan ózeniniń jaǵalaýyn bekitý jáne arnasyn tereńdetý jobasy bastaldy. Qalqutan, Eski Qalqutan jáne Eńbek aýyldaryn sý basý qaýpin azaıtý maqsatynda 17 mln tekshe metrge deıin erigen sýdy ustaı alatyn «Qyzyl Juldyz» bógetine kúrdeli jóndeý jumystary aıaqtalýǵa jaqyn.
Tselınograd aýdanynda Qanat Bozymbaev Aqmol – Nuresil – Talapker oblystyq jolynyń apatty ýchaskesinde avtomobıl kópirin salý máselesin talqylady. Bul Esil ózeniniń arnasyn túzeý jobasyn tolyq aıaqtaýǵa múmkindik beredi. Sondaı-aq Premer-mınıstrdiń orynbasary Tselınograd aýdanynda atqarylǵan tasqynǵa qarsy is-sharalar týraly esepti tyńdady.
Jalpy Aqmola oblysynda tasqynǵa qarsy sharalar 163 eldi meken men 32 jol ýchaskesin qamtydy. 70 eldi mekende sý basý qaýpi joıyldy. Qalǵan eldi mekenderde qaýip barynsha azaıtyldy. Sońǵy eki jylda sý basý qaýpi bar aýmaqtardan 718 otbasy kóshirildi.
Azamattyq qorǵaý qyzmetteriniń kúshteri men quraldary joǵary daıyndyq rejımine kóshirildi. Bul – 2,5 myń adam, 1 myńnan astam tehnıka, 400-ge jýyq motopompa jáne 37 júzý quraly. Qajetti ınertti materıaldar, qaptar men janar-jaǵarmaı qory daıyndaldy.
15 naýryzdan bastap tasqynǵa qarsy shtabtar táýlik boıy jumys isteıdi. Qaýipti ýchaskelerde turaqty monıtorıng júrgizý maqsatynda 19 dron qoldanylýda.
«Qazgıdromet» RMK derekterine sáıkes, Aqmola oblysynda tasqynnyń sharyqtaý kezeńi 30 naýryzdan keıin bolady dep kútilip otyr. «Tasqyn» aqparattyq júıesindegi modeldeý nátıjeleri boıynsha qaýip aımaǵynda Astrahan, Atbasar jáne Bulandy aýdandaryndaǵy eldi mekender bar.
-Bizdiń mindetimiz – tasqynnyń sharyqtaý kezeńin tolyq daıyndyqpen qarsy alý. Barlyq aldyn alý sharalary barynsha qysqa merzimde aıaqtalýy tıis. Aldyn ala áreket etip, qaýip aımaǵyndaǵy eldi mekenderdiń tolyq daıyn bolýyn qamtamasyz etý qajet, – dep atap ótti Qanat Bozymbaev.
Vıtse-premer qardy táýlik boıy shyǵarýdy qamtamasyz etýdi, ózen arnalary men sý ótkizý qurylystaryn tazartý jumystaryn jedeldetýdi, ýaqytsha ornalastyrý pýnktterin tekserýdi, qajetti tehnıka men materıaldardyń rezervin daıyndaýdy, sondaı-aq halyqty ýaqtyly aqparattandyrýdy tapsyrdy.
Osyǵan deıin sý tasqyny qarsańynda kólik ınfraqurylymyna erekshe baqylaý engizilgeni týraly jazdyq.