70 jyl boıy jazdym: Narıman Qypshaqbaevtyń sý sharýashylyǵy týraly eki tomdyǵy shyqty
ASTANA. KAZINFORM – Ortalyq Azııanyń Memleketaralyq sý sharýashylyǵyn úılestirý komıssııasynyń (MSShÚK) 90-shy otyrysynda komıssııanyń negizin qalaýshy, eńbek sińirgen gıdrotehnık jáne Qazaqstannyń burynǵy Sý sharýashylyǵy mınıstri Narıman Qypshaqbaevtyń eki tomdyq kitabynyń tusaýkeseri ótti.
«Qazaqstannyń sý sharýashylyǵy: qalyptasýy, damýy jáne máseleleri» dep atalatyn eńbek – elimizdegi sý resýrstaryn basqarý, aýyl sharýashylyǵynda sýdy tıimdi paıdalaný, sý tapshylyǵy men transshekaralyq sý qatynastary jónindegi zańnamalyq qujattar men materıaldardyń keshendi taldaýy. Ol 1917 jyldan 2024 jylǵa deıingi kezeńdi qamtıdy.
Jınaqta sý jáne jer paıdalanýdyń alǵashqy qaǵıdattarynan bastap, 2025 jyly qabyldanǵan jańa Sý kodeksine deıingi mańyzdy tarıhı derekter keltirilgen. Sondaı-aq resmı qujattar, konferentsııa materıaldary, ǵylymı maqalalar, tájirıbelik usynystar men sala mamandarynyń baıandamalary engizilgen.
Bıyl 91 jasqa tolǵan Narıman Qypshaqbaev bul eńbekti 70 jyl boıy jazǵan. Qazirgi ýaqytta sý salasynyń ardageri jas mamandarǵa arnalǵan jańa kitap daıyndap jatyr.
«Bul kitapqa qajetti materıaldardy men sý sharýashylyǵynda jumys isteı bastaǵan kezden, ıaǵnı 70 jyl boıy jınadym. Áýeli bul eńbek mamandarǵa arnalǵan, biraq qazirgi zamanda sýdy durys paıdalanýdy ár adam bilýi kerek. Kelesi maqsatym – sý salasynda jumys istegisi keletin jas gıdrotehnık-ınjenerlerge arnalǵan kitap shyǵarý», – dedi Narıman Qypshaqbaev.
Aıta keteıik, Ulttyq elektrondy kitaphanany paıdalanýshylar sany 44% artty.