70 jastaǵy tájik stýdenti Gınness kitabyna enýden úmitti
ASTANA. QazAqparat - Tájikstannyń Hatlon oblysy Jylykól aýdanyndaǵy Seıým aýylynyń turǵyny Gýlomhaıdar Iskandarov 70 jasynda joǵary oqý ornynyń tabaldyryǵyn attady.
2014 jyly ol Nosır Hýsrav atyndaǵy Qorǵantóbe memlekettik ýnıversıtetiniń tájik fılologııasy fakýltetine syrttaı oqýǵa tústi, dep habarlaıdy Azattyq.
Buryn Hatlon oblysyndaǵy pedagogıkalyq, aýylsharýashylyq jáne tehnologııalyq kollejderdi bitirgen qarııa týǵan aýylynda bastaýysh mektepke sabaq berip kelgen. Zeınetker ejelgi armany - ýnıversıtette bilim alý úshin oqýǵa túskenin aıtady. Birneshe jyl buryn zaıyby qaıtys bolǵan. Eki uly - Reseıde eńbek mıgranty, al eki qyzy - úıli-barandy, sondyqtan Gýlomhaıdar Iskandarov ómirdiń jańa belesine bet burady. Ol fılologııa fakýltetin bitirgen soń zań fakýltetiniń syrttaı bólimine túsýdi josparlap otyr.
Gýlomhaıdar Iskandarov oqýǵa qınalmaıtynyn aıtady. «Sondyqtan jylyna eki ret 40 kúnnen oqý maǵan qıyn emes», - deıdi ol.
Gýlomhaıdar jas kezindegi armanyn júzege asyryp, egde tartqan shaǵynda ýnıversıtetke túsýge reseılik 74 jastaǵy stýdent úlgi bolǵanyn aıtady. Ol týraly teledıdardan estigen qarııa «Gınnestiń rekordtar kitabyna men týraly jazsa qýanatyn edim», deıdi.
Qorǵantóbe memlekettik ýnıversıteti ákimshiligi «jańa hám qart» stýdenttiń oqýǵa túskenine tańǵaldy. Ádette dástúrli tájik qoǵamynda 60-tan asqan adamdar ózderin qarttar sanatyna jatqyzyp, jumystan alshaqtap, dinge bet burady jáne nemerelerin tárbıeleıdi.
Degenmen olar Gýlomhaıdar Iskandarovtyń bul áreketin «elge úlgi» dep baǵalap, «jas stýdenterge de ónege» dep sanaıdy. Qorǵantóbedegi Nosır Hýsrav atyndaǵy ýnıversıtet prorektory Abdýlhaı Komılı Iskandarovqa deıin JOO-da 50 jastaǵy stýdenttiń «eń kári shákirt» sanalyp kelgenin aıtty. «Eger 70-tegi adam bilim alýǵa umtylsa, ony tek qoldaý kerek»,- deıdi ol.
Al Gýlomhaıdar Iskandarov dáris tyńdap, tájirıbelik sabaqtarǵa qatysyp, qysqy sessııadaǵy alǵashqy emtıhanyn tapsyrýǵa daıyndalyp júr.
