70 jastaǵy Shvartsenegger «Termınator-6»-ǵa túsedi
ASTANA. QazAqparat - Amerıkalyq akter, Kalıfornııa shtatynyń burynǵy gýbernatory Arnold Shvartsenegger ózine asqan tanymaldylyq alyp kelgen «Termınator» fılminiń altynshy bólimine túsetin bolady. Bul týraly juma kúni Fox News telearnasy habarlady.
«Kelesi jyldyń naýryz aıynda «Termınatordyń» túsirilimine qatysamyn. (Rejısser) Djeıms Kemeron men (prodıýser) Devıd Ellıson túsirilim tobynyń quramyna qaıta oralatyn bolady», - dep keltiredi telearna 30 shilde kúni 70 jasqa tolǵan Shvartseneggerdiń sózderin.
Djeıms Kemeron fantastıkalyq boevıktiń altynshy bólimin túsirý týraly sheshimin rastady jáne Kalıfornııanyń eks-gýbernatory termınatordyń emes, onyń prototıpi - adamnyń rólin somdaıtynyn jetkizdi.
Shvartsenegger 1947 jyly Avstrııanyń Gratsa qalasynyń mańyndaǵy aýylda dúnıege kelgen. AQSh-qa 21 jasynda kelip, aldymen bodıbıldıngte, keıin kınoda ózine tamasha mansap jasaı aldy. Oǵan álemdik tanymaldylyqty «Konan-varvar», (Conan the Barbarian, 1982), «Termınator» (The Terminator, 1984), «Kommandos» (Commando, 1985), «Jyrtqysh» (Predator, 1987), «Bárin eske túsirý» (Total Recall, 1990) fılmderi alyp keldi.
«Termınatordyń» buǵan deıin túsirilgen bes bóliminiń tórteýinde Shvartsenegger robottyń rólin oınady.
