70 jastaǵy pavlodarlyq Grekııada gir sportynan rekord jańartty
PAVLODAR. QazAqparat - Pavlodarlyq sportshy Valentın Ýhov Grekııada óziniń jas ereksheligine qaraı álemdik rekord jańartyp, altyn medal ıelendi, dep habarlaıdy «QazAqparat» HAA tilshisi.
Pavlodardyq sportshylar komandasy gir sportynan Grekııada ótken álem chempıonatynan altyn medaldarmen oraldy.
Máselen, ardager Valentın Ýhov óziniń jastyq tobynda 16 kelilik gir tasyn 64 ret kóterip rekord ornatty. Pavlodar oblystyq dene shynyqtyrý jáne sport basqarmasy ony jan-jaqty daıyndalǵan sportshy jáne belsendi azamattyq pozıtsııaly adam retinde baǵalady. Valentın Ýhov gir kóterip qana qoımaı, jeńil atletıkamen de aınalysady. Pavlodar oblysynyń ardagerler komandasy aldaǵy ýaqytta Ońtústik Koreıada ótetin chempıonatta óner kórsetpek. Alaıda, ol chempıonatqa Ýhovtyń baratyny ázirge belgisiz, barlyǵy sportshylardyń jolyn qarjylandyrý múmkindikterine baılanysty.
Valentın Ýhovtyń Pavlodar oblysy ardagerler komandasynyń atynan shyǵyp júrgenine biraz ýaqyt boldy jáne ol birtalaı jarystarda Qazaqstannyń namysyn qorǵap keldi. Jalpy aıtqanda, bul kategorııada Pavlodar oblysynda sportta aıtarlyqtaı jetistikke jetken basqa da aqsaqaldar esimin ataýǵa bolady, máselen: jeńil atlet, shańǵyshy, dzıýdodan KSRO sport sheberi Vladımır Krıvýshkın, marafonshy Aleksandr Taranchenko, sondaı-aq, boksshylar Omar Janarǵalıev, Serik Serǵazın jáne basqalar.
Gir sportynan Grekııada ótken álem chempıonatyna 25 eldiń komandalary qatysty. Eń sany az komanda Qazaqstan quramasy boldy.
