70-ten astam elordalyq ókpeniń sozylmaly aýrýyna qarsy kúres boıynsha keńes aldy
ASTANA. 22 qarasha. QazAqparat - Astanada №1 qalalyq aýrýhanada «Áli de kesh emes» uranymen Dúnıejúzilik sozylmaly obstrýktıvti ókpe aýrýlaryna qarsy kúres kúni atap ótildi. Bul týraly astana.kz saıtyna №1 qalalyq aýrýhananyń marketıng jáne halyqaralyq yntymaqtastyq bóliminen habarlady.
Shara barysynda elordalyq belgili pýlmonolog dárigerler «Astana» medıtsına ýnıversıteti» AQ pýlmonologııa kafedrasynyń professorlarymen jáne dotsentterimen birlesip naýqastarǵa keńes berdi. Bul kúni 70-ten astam Astana turǵyny mamandardyń kómegine júgindi. Sonymen qatar, dárigerler men naýqastarǵa arnalǵan dárister de oqydy. Atalǵan indetke qarsy kúres týraly dáristerdi 130 elordalyq dáriger tyńdady.
Astana qalasynyń densaýlyq saqtaý basqarmasynan habarlaǵandaı, qalada 3 myńnan astam adam sozylmaly obstrýktıvti ókpe aýrýlaryna shaldyqqan. Mamandardyń atap ótýinshe, indettiń týyndaýynyń basty sebepteriniń biri - temeki shegý.
Uıymdastyrylǵan is-sharanyń maqsaty - aýrýdyń týyndaý sebepterine nazar aýdarý, aýrý týraly málimetterdi keńinen taratý, naýqastarǵa kórsetiletin kómekti jaqsartý, temekige táýeldiliktiń taralýyn tómendetýge áser etý, temeki shegýdiń aldyn alý jáne onyń aǵzaǵa zııandy áseri týraly qoǵamdy aqparattandyrý bolyp tabylady.
