70-ten asqan qazaq ájeleri podıýmdardy baǵyndyryp júr
ASTANA. KAZINFORM — Kásipker Qorlan Qalıeva qazaqtyń oıýly shapanyna degen kózqaras sońǵy jyldary aıtarlyqtaı ózgergenin aıtady. Onyń sózinshe, búginde ulttyq kıim tek merekelik sán emes, kúndelikti stıldiń bir bóligine aınalǵan.
— 1990 jyldardan bastap jumysqa ulttyq kıim kıe bastadym. Ol kezde mysqyldap kúlgender boldy. Biraq ýaqyt óte kele qyzyǵýshylyq artty. Keıin osy áýestigim kásipke aınaldy, — dedi spıker Búgin Live baǵdarlamasynda.
Kásipker bul baǵytty bıznes retinde damytýmen shektelmeı, áleýmettik bastamaǵa da ulastyrǵan. Ol egde jastaǵy áıelderdi sán álemine tartýdy maqsat etip, olardy podıýmǵa daıyndaıtyn «Jasar» uıymyn qurdy.
— 2007 jyly dızaıner Aıdarhan Qalıevpen birge jumys istedim. Almatydan Astanaǵa kóshkennen keıin kıim óndirisine den qoıdyq. Sol kezeńde «Jasar» toby da quryldy, — dedi kásipker.
Búginde top el ishinde ǵana emes, halyqaralyq deńgeıde de tanylyp úlgergen. Quramynda 70 jastaǵy Baný Júsipova bar ujym Bolgarııa men Frantsııadaǵy sán kórsetilimderine qatysyp, ulttyq kıimdi álemge tanytyp júr. Qazir tájirıbeli model uıym kelýshilerine sán áleminiń qyr-syryn úıretýde.
— Kelýshilerge arnaıy defıle ótkizemiz, daıyndyqqa shamamen eki apta qajet. Jaqynda ulttyq kıimder sherýine de qatystyq, — dedi ol.
Kásipkerdiń aıtýynsha, ulttyq kıim — tek sán ındýstrııasynyń elementi emes, rýhanı qundylyqtyń mańyzdy kórinisi.
— Ulttyq kıim men ulttyq rýhty bólip qaraýǵa bolmaıdy, ári ol jas talǵamaıdy. Biz qazir shapandy zamanaýı stılmen úılestirip, syrt kıim retinde kıip júrmiz. Bas kıimderdi de ádemilep qoldanamyz. Qýantatyny, jastardyń da buǵan qyzyǵýshylyǵy artyp keledi, olar jańa trendterdi qoldaýǵa daıyn, — dedi ol.
Aıta keteıik, búgin elimizde Ulttyq kıim kúni.
