70 myń adam qazaq tilin onlaın-kýrs arqyly úırenip jatyr

ASTANA. QazAqparat - Astanada «Jańa álipbı - jańǵyrý joly» taqyrybynda ótken dóńgelek ústelde Memlekettik tildi damytý qorynyń dırektory Azat Sháýeev qazaq tilin onlaın-kýrs túrinde úıretetin soyle.kz saıtyna dúnıe júzinen 70 myńǵa jýyq adamnyń tirkelgenin málim etti, dep habarlaıdy «QazAqparat» HAA tilshisi.

«Ózderińiz biletindeı, Memleket basshysy latyn álipbıine kóshý týraly jarlyqqa qol qoıdy. Onda Úkimetke ulttyq komıssııa qurý týraly tapsyrma berilip, 2025 jylǵa deıin kezeń-kezeń boıynsha baǵdarlamasyn ázirleý júkteldi. Jalpy, barlyǵy derlik qoldaý bildirip jatyr. Onyń bir ǵana mysaly - bizdiń Memlekettik tildi damytý qory ózderińiz biletindeı, sońǵy 2-3 jyldan beri ınternettiń arqasynda «Sóıle.kz» saıty arqyly onlaın-kýrspen qazaq tilin oqytyp keledi. Mine, búgingi tańda saıtymyzǵa dúnıe júzinen 70 myńǵa jýyq adam tirkelip, onlaın-kýrspen til úırenip jatyr», - deıdi qor dırektory.

Onyń aıtýynsha, úsh jyldan beri «biz kırıll qarpin túsinbeımiz, biz orys tilin bilmeımiz» dep birneshe márte hat jazyp, onlaın-kýrsty latyn álipbıinde ótkizý týraly shetelden kóptegen usynystar kelgen.

«Bizdiń qor Elbasynyń jarlyǵyn qýana-qýana qarsy aldy. Jarlyq shyǵa sala biz bul jumysqa kirisip kettik. Sátin salsa, jańa jylǵa deıin Sóıle.kz saıtynyń aǵylshynsha jáne latynsha nusqasyn ashamyz. Sol arqyly sheteldegi qazaqtarǵa óz tilin úırený jeńildeı túsedi», - deıdi Azat Sháýeev.