7 jylǵa júrgizýshi kýáliginen aıyrylǵan azamat mas kúıde qaıta rýlge otyrǵan
TARAZ. QazAqparat – Jambyldyq polıtsııa qyzmetkerleri 7 jylǵa júrgizýshi quqyǵynan aıyrylǵanyna qaramaı qaıta mas kúıinde rýlge otyrǵan júrgizýshini ustady,- dep habarlaıdy QazAqparat tilshisi.
Moıynqum aýdanynyń Jambyl aýylyna kire beriste ÝAZ avtokóligin basqarǵan 33 jastaǵy turǵyn ustaldy. Qujattaryn tekserý kezinde júrgizýshiniń mas ekendigi anyqtaldy.
«Medıtsınalyq anyqtamaǵa sáıkes, júrgizýshi kólik quralyn ortasha mas kúıde basqarǵan. Sonymen qatar, ol buryn sot sheshimimen QR ÁQBtK-niń 608-babyn buzǵany ıaǵnı kólik quralyn mas kúıinde basqarǵany úshin 7 jyl merzimge júrgizýshi kýáliginen aıyrylǵandyǵy anyqtalǵan. Qoldanystaǵy shekteýlerge qaramastan, josyqsyz júrgizýshi mas kúıde qaıtadan rýlge otyrǵan. Endi ol qylmystyq jaýapqa tartylýy múmkin»,-delingen Polıtsııa departamentiniń baspasóz qyzmetiniń habarlamasynda.
Atalǵan fakti boıynsha QR QK 346-baby 1-bóligi boıynsha sotqa deıingi tergeý bastaldy.
