7 jylda aýylda turatyn 7 mln turǵynnyń ómir súrý sapasy jaqsarady – Roman Sklıar

NUR-SULTAN. QazAqparat 7 jylda aýylda turatyn 7 mln turǵynnyń ómir súrý sapasy jaqsarady. Bul týraly búgin Úkimet otyrysynda «Aýyl - el besigi» baǵdarlamasynyń júzege asyrylý barysy jaıynda baıandaǵan QR Premer-Mınıstriniń orynbasary Roman Sklıar aıtty, dep habarlaıdy QazAqparat tilshisi.

«Júrgizilip jatqan ınfraqurylymdy jańǵyrtý aýyl ekonomıkasyn damytýǵa jańa serpin beredi. Osyǵan baılanysty oblys ákimdikteri damý áleýeti bar árbir aýyl ekonomıkasyn damytý josparyn ázirlep qabyldaý qajet. Jospar birinshi kezekte aýylda ınvestıtsııalar men qajetti kadrlardy tartý, sondaı-aq shaǵyn jáne orta bıznesti damytý jónindegi is-sharalardy qamtýy tıis. Árbir aýyl ákiminiń aýyldy odan ári damytýdyń naqty paıym, kózqarasy bolýy qajet», - dedi Roman Sklıar.

Onyń atap ótýinshe, usynylǵan sharalardy tıimdi iske asyrý úshin, respýblıkalyq jol kartasynyń jobasy ázirlendi. Osyndaı karta árbir oblysta ázirlenýi tıis.

«Biz ákimdiktermen birlesip, tirek jáne spýtnıktik aýyldardy jyldar boıynsha 2027 jylǵa deıin damytý kestesin qalyptastyrýymyz qajet. «Aýyl – El besigi» jáne basqa da memlekettik baǵdarlamalar aıasynda árbir aýyldy qarjylandyrý kólemi men kózderin anyqtaý qajet. Aýyl ekonomıkasyn damytý kartasyn ázirlep, tıisti jobalyq qujattamany daıyndaý kerek«, - dedi ol.

Vıtse-premerdiń dereginshe, jobany iske asyrý 7 jyl ishinde 7 mln aýyl turǵynynyń ómir súrý sapasyn jaqsartýǵa múmkindik beredi. 7 myń shaqyrymnan astam kentishilik kósheler salynyp, jóndeýden ótkiziledi.

»Barlyq aýyl halqy sapaly aýyz sýmen qamtylatyn bolady. Áleýmettik nysandardy jańǵyrtý boıynsha keń aýqymdy jumystar júrgiziledi. Jalpy, barlyq sharalar kesheni aýyldardy odan ári serpindi damytýdy qamtamasyz etedi, bul óz kezeginde el ekonomıkasyna oń áserin tıgizedi«, - dedi Úkimet basshysynyń orynbasary.