7 jyl halyqaralyq izdeýge bolǵan qylmysker Nur-Sultanda ustaldy
Atap aıtqanda, elordanyń polıtsııa qyzmetkerleri Jeńis dańǵyly boıyn sholǵyndaý barysynda ózin kúdikti ustaǵan ári jeke basyn kýálandyratyn qujattary bolmaǵan azamatty toqtatqan. Onyń turǵylyqty jeri de bolmaǵany anyqtaldy. Tulǵasyn anyqtaý úshin er adam Nur-Sultan qalalyq Polıtsııa departamentiniń qabyldaý-taratý ornyna jetkizgen. Nátıjesinde, ol 1983 jyly dúnıege kelgen Qyrǵyz Respýblıkasynyń azamaty ekendigi, 2013 jyldan beri halyqaralyq izdeýde bolǵany belgili boldy.
«Ustalǵan azamat qabyldaý-taratý ornyna túsken kezde ózine qatysty múldem basqa málimetter berip, aty-jónin jalǵan aıtty. Júrgizilgen sharalardyń barysynda onyń kim ekendigi anyqtalyp otyr», - dedi Nur-Sultan qalalyq PD qabyldaý-taratý ornynyń bastyǵy Asqar Túrekenov.
«Ýchaske» aldyn alý sharasy ótken úsh kúnniń ishinde ýchaskelik polıtsııa ınspektorlary 568 ákimshilik quqyq buzýshylyqty anyqtady. Olardyń qatarynda qoǵamdyq orynda ishimdik ishý, kishigirim buzaqylyq, otbasylyq-turmystyq sıpattaǵy quqyqqa qaıshy áreketter, menshik ıeleriniń azamattardy páterlerine zańsyz tirkeýi syndy zań buzýshylyqtar bar. Sonymen qatar ýchaskelik poltsııa qyzmetkerleri osy ýaqytta ózderi qyzmet kórsetetin turǵyn úıalaptary men kópqabatty úılerdiń aýmaǵynda 4 myńnan astam tekserip shyǵý jumystaryn júrgizdi.