7 jylda tegin dári-dármekpen qamtamasyz etýge 1,3 trln teńge bólindi
ASTANA. KAZINFORM – Sońǵy jeti jyldyń ishinde Qazaqstanda azamattardy tegin dári-dármekpen qamtamasyz etýge shamamen 1,3 trln teńge baǵyttaldy. Jyl saıyn orta eseppen 3,3 mln patsıent qajetti dárilik preparattarmen qamtamasyz etildi.
Densaýlyq saqtaý mınıstrligi satyp alý júıesin jetildirý, dári-dármek baǵasyn tómendetý jáne halyq úshin emniń qoljetimdiligin arttyrý boıynsha jumysty jalǵastyryp jatqanyn habarlady.
2019–2025 jyldar aralyǵynda tegin dári-dármekpen qamtamasyz etýge bólinetin qarjynyń kólemi úsh eseden astam ósip, 83 mlrd teńgeden 272,9 mlrd teńgege deıin ulǵaıdy. Osy kezeńde tegin dári-dármek alatyn patsıentterdiń sany 2,5 mln-nan 3,4 mln adamǵa deıin artty.
2026 jyly dárilik zattar men medıtsınalyq buıymdardy satyp alýdyń jalpy jospary 584,1 mlrd teńge kóleminde bekitildi. Bul ótken jylmen salystyrǵanda 9,6%-ǵa kóp.
Satyp alý júıesin jetildirýdiń negizgi nátıjeleriniń biri – otandyq óndiristiń 66 dárilik preparatynyń baǵasyn tómendetý boldy. Bul bıýdjet qarajatyn 10,3 mlrd teńge kóleminde únemdeýge múmkindik berdi.
Densaýlyq saqtaý mınıstrligi otandyq jáne sheteldik óndirýshilerden tikeleı satyp alý tájirıbesin de keńeıtip jatyr. 2026 jyly tikeleı kelisimsharttar boıynsha satyp alynatyn dárilik zattar men medıtsınalyq buıymdardyń ataýy 404-ke deıin ósti. 2025 jyly bul kórsetkish 182 ataý bolatyn.
Sonymen qatar halyqaralyq uıymdarmen yntymaqtastyq keńeıtilip jatyr. Bıyl BUUDB, ıÝNISEF jáne týberkýlezben kúres jónindegi halyqaralyq tetikter arqyly 32 ataýdaǵy dárilik zattardy satyp alý kózdelgen. Ótken jyly bul kórsetkish 23 ataý quraǵan.
Satyp alý tetikterin jetildirý bıýdjet qarajatyn tıimdi paıdalanýǵa, dári-dármek jetkizilimderiniń turaqtylyǵyn qamtamasyz etýge jáne patsıentter úshin tegin dári-dármektiń qoljetimdiligin arttyrýǵa baǵyttalǵan.
Dárigerdiń qateliginen patsıent zardap shekse, ótemaqyny kim tóleıtinin jazǵan edik.
