7 jastaǵy qyz anasyn qutqarý úshin polıtsııaǵa qońyraý shalǵan
NUR-SULTAN. QazAqparat - 7 jastaǵy qyz ákesiniń anasyn uryp-soǵyp jatqany týraly «102» pýltine qońyraý shaldy, dep habarlaıdy QazAqparat tilshisi qalalyq polıtsııa departamentine silteme jasap.
«Ýchaskelik polıtsııa ınspektory oqıǵa ornyna dereý keldi. Tekserý barysynda otbasynyń 43 jastaǵy otaǵasy ishimdik iship, turmystyq negizde otbasylyq janjal týdyryp, áıelin ura bastaǵany anyqtaldy. Qorqyp qalǵan qyz polıtseılerdi shaqyrdy», - delingen habarlamada.
Otbasylyq janjaldy shyǵarǵan er adamnan ańshylyqqa arnalǵan qarý tárkilendi.
«Atalǵan fakt boıynsha QR ÁQBtK-niń 73-shi baby boıynsha is qozǵalyp, Nur-Sultan qalasy boıynsha Mamandyrylǵan aýdanaralyq ákimshilik sotyna joldandy», - dedi departamentten.
Eske sala ketsek, elordada «Ýchaske» jedel aldyn-alý is-sharasy jalǵasýda. Onyń maqsaty - qylmys pen quqyq buzýshylyqty aldyn-alý boıynsha azamattarmen túsindirý áńgimelerin ótkizý. Jedel aldyn-alý is-sharasy bastalǵaly ýchaskelik ınspektorlar 263 myńnan astam úıdi aralap shyqty.
