7 jastaǵy aqtóbelik álemdik rekord ornatýǵa daıyndalýda
Mýsa Týrkýmbaev 3 jasynan bastap sportpen shuǵyldandy. Ol ózge balalar sekildi asyr salyp oınaıdy, biraq týrnıkke tartylǵandy unatady. Aǵashtyń butalaryna, turǵyn úı aýlasyndaǵy týrnıkke ilinip, tartylǵandy unatatyn bala óz yntasymen eldi tańqaldyryp júr.
Tek buǵanasy qatpaǵan Mýsaǵa áli kásibı sportpen shuǵyldanýǵa bolmaıdy. Sondyqtan ákesi Ashat Týrkýmbaev bar ýaqytyn balaǵa arnap, qazir arnaıy sport zalǵa aparyp júr. Ákesiniń qamqorlyǵyndaǵy bala kóktemde jańa rekord ornatýǵa daıyndalyp jatyr.
«Mýsa kishkentaı balalar, eresekter jasaı almaıtyn dene jattyǵýlaryn kórsete alady. Bárin ózi beınerolıkterden kórip, qarap, úırenedi. Qazirgi kezde kúndelikti 35 ret týrnıkke tartylady. Al rekordy - 55. Kúnine 300-500 ret keýdeni jerden kóteredi. Al bul jattyǵýdy 1600 ret oryndap, rekord isteı alady. Jattyǵý jasaǵan, sportpen shuǵyldanǵan ózine unaıdy. Zamandastary kompıýterden, planshetten kóz almaı otyrady, al Mýsa dalada júredi. Telefonǵa 1 saǵatyn ǵana bóledi»,- dedi Ashat Týrkýmbaev.
Mýsa Týrkýmbaeva Aqtóbe qalasyndaǵy №23 orta mektepte oqıdy. Sabaq úlgerimi jaqsy, qazaq, orys tilderin erkin meńgergen. 1 synyp oqýshysyn ata-anasy gımnastıka, ý-shýǵa apardy. Biraq Mýsa zerigip, jattyǵýǵa barýdan bas tartqan.
«Taıaýda Astana qalasyndaǵy sport ortalyǵynyń ashylýyna baryp keldi. Sol kezde UFC sheberi, balýan Artem Lobov, Street Workout federatsııasynyń vıtse-prezıdenti Islam Badýrgov, aǵa jattyqtyrýshy Aıtym Jaqypov, dzıýdodan Frantsııa chempıony, Eýropa Kýboginiń chempıony, MMA sheberi Abýkar ıAndıev kelip, kezdesti. Álem boıynsha strıt vorkaýt, ıaǵnı, kóshe sportymen aınalysatyn balalar az. Eń jasy Mýsa. Bárin qarap, baqylap otyramyz. Álemdik rekord Ýkraınada ornatylǵan eken. Biz ony jańartýdy kózdep otyrmyz. Ústine salmaq qospaı 55 ret, salmaq qosyp 20 ret tartylýdy josparladyq. Astanaǵa barǵan soń bizdi sportshylar tanyp, Los Andjelesten habar kútip otyrmyz. Balamnyń kásibı sportpen aınalysqanyn qalaımyn. Jańa jol ashylsa, biz de balamyzdyń janynda bolyp, oǵan qoldaý kórsetemiz»,- dedi Mýsa Týrkýmbaeva.
Aıta keteıik, kishkentaı sportshy tamaq talǵamaıdy, biraq et jegendi unatpaıdy. Tańerteń arnaıy botqa jeıdi. Salmaǵy 23 keli bolatyn sportshy táttige qumar. Ata-anasy táttige shekteý qoıǵan emes.
«Jazda Mýsa jarysqa túsken bolatyn. Keýdeni jerden kóterýden 20 jastaǵy balamen synǵa túsip, jeńip shyqty. Balamyzdyń yntasy men múmkindikterin qalt jibermeı, ony tárbıelegimiz keledi. Boks, erkin kúres mektepterinen habarlasty, biraq ózi dzıýdony, strıt vorkaýt qalap otyr. 10 jasqa kelgen soń ózi qalaǵan sportpen shuǵyldanady. Talanttyń shyn baǵalanǵanyn qalaımyz»,- dedi ákesi A.Týrkýmbaev.
Mýsa túrli jattyǵý jasap, dene jaraqatyn da aldy. Ata-anasynyń aıtýynsha, 4 jasynda qolyn syndyryp, dárigerlerdiń baqylaýynda bolǵan. Bir qoly gıpspen bekitilgenine qaramastan erjúrek bala jattyǵýyn toqtatpaǵan. Endi ol álemdi moıyndatýdy qalaıdy.
