7 jasar Mılananyń ólimi: Oblys ákiminiń orynbasary, Ekibastuzdyń ákimi, basqarma basshylary sógis aldy

Pavlodar oblysynyń ákimi Ekibastuzda balalarǵa qarsy qylmystardyń aldyn alý boıynsha arnaıy jınalys ótkizdi, dep habarlaıdy Kazinform.

— Besqaýǵa aýylyndaǵy jeti jasar Mılana Davydovamen bolǵan jan túrshigerlik oqıǵa eshkimdi beı-jaı qaldyrmady. Mundaı jańalyqtardy estigende júregiń eziledi. Mıǵa syımaıtyn, adamǵa múldem jat qylyq. Bul qaıǵyly jaǵdaıdyń aldyn alýǵa bolatyn edi. Beıbit ýaqytta balalar siz ben bizdiń kinámizden, eresekterdiń kinásinen qaza bolyp jatyr, — dedi Asaıyn Baıhanov.

Oblys ákimi ótken jyldyń aqpan aıynda «maýglı-balalarmen» bolǵan oqıǵany eske salyp, odan eshkimniń sabaq almaǵanyn atap ótti.

Óńir basshysy otbasyndaǵy keleńsizdikterdi alǵashqylardyń biri bolyp baıqaıtyn muǵalimderdiń nazaryn aýdardy: mektepte 17 muǵalim men 51 oqýshy bar.

Ekibastuzdyń kámeletke tolmaǵandar isteri jónindegi komıssııa tóraǵasynyń álsiz jumysy, ýchaskelik polıtsııa qyzmetkeri jáne Besqaýǵa aýylynyń ákimi tarapynan olqylyqtar bar.

Pavlodar oblysy bilim basqarmasynyń basshysy Samal Aıtqazınanyń málimetinshe, jyl basynan beri balalarǵa qatysty 250-ge jýyq zańǵa qaıshy keletin faktiler anyqtalǵan, onyń 66-sy Ekibastuz qalasynda.

Mamandar mundaı joǵary kórsetkishti qorǵanshylyq organdary mamandarynyń jáne kámeletke tolmaǵandar isteri jónindegi ınspektorlardyń jetkiliksizdigimen baılanystyrady.

Asaıyn Baıhanov oqý oryndaryndaǵy profılaktıkalyq qyzmet júıesine taldaý júrgizip, túbegeıli qaıta qaraýdy, balalardy zorlyq-zombylyqtan qorǵaý jónindegi keshendi jospardy pysyqtaýdy jáne táýekel aımaǵyndaǵy árbir otbasy úshin ýchaskelik polıtsııa qyzmetkerleri men áleýmettik qyzmetterge birlesken áleýmettik patronaj belgileýdi tapsyrdy.

Bul rette óńir basshysy bul jumysqa mektep pedagogtaryn tartýǵa shekteý qoıý kerektigin atap ótti.

Árbir osyndaı otbasyn aralap, balalardyń ómir súrý jaǵdaıymen bilim, áleýmettik qorǵaý jáne polıtsııa qyzmetiniń mamandary tanysýǵa tıis.

Sondaı-aq, jedel kómek berý jelisiniń nómirlerin 65-00-60, 8707-491-64-05, bala quqyqtary jónindegi ýákildiń «111» biryńǵaı baılanys arnasyn barlyq jerge taratý qajet.

Ekibastuz ákimine Davydovtar otbasyn baqylaýǵa alý tapsyryldy.

Jınalysta 17 qarasha kúni Shiderti kentinde qaıtys bolǵan segiz aılyq balaǵa qatysty taǵy bir sumdyq jaǵdaı qaraldy. Oblys ákimi jaǵdaıdy egjeı-tegjeıli túsinip, tıisti sharalar qabyldaýdy tapsyrdy.

Jmnalys qorytyndysy boıynsha óńir basshysy laýazymdy tulǵalarǵa jaza qoldaný týraly sheshim qabyldady.

Áleýmettik salanyń jumysyna jetekshilik etetin oblys ákiminiń orynbasary — Aızada Qurmanovaǵa, Ekibastuz qalasynyń ákimi — Aıan Beısekınge, oblystyq bilim jáne áleýmettik qorǵaý basqarmalarynyń basshylary — Samal Aıtqazına men Almıra Dısıýpovaǵa sógis jarııalandy.

Sondaı-aq, oblys ákimi kenshiler qalasynyń basshysyna Ekibastuzdyń laýazymdy tulǵalaryna tártiptik shara qabyldaýdy, onyń ishinde Qoıandy aýyl okrýginiń ákimi Abaı Hakımovtyń odan ári jumysy týraly máseleni qaraýdy tapsyrdy.

Óńir basshysy barlyq qoǵam, ásirese, ýákiletti memlekettik qyzmetshiler balalardyń ómiri men densaýlyǵyn qorǵaýy tıis ekenin eske saldy.

— Árbir osyndaı jaǵdaı — bizge óńirdiń, qalanyń, aýyldyń tynys-tirshiligin qamtamasyz etýdi senip tapsyrǵan turǵyndarymyzǵa opasyzdyq jasaǵanmen teń ekendigin kórsetedi. Biz qandaı qoǵamda ómir súrgimiz keletini týraly suraqqa jaýap berýimiz kerek. Tipti, balanyń ólimine ákelgen bir oqıǵa — bul úlken qaıǵyly jaǵdaı, al, olardyń sońǵy ýaqytta júıeli túrde qaıtalanýy úlken tragedııa. Balalar — qoǵamnyń qorǵalmaǵan bólshegi, olardyń densaýlyǵyn, qaýipsizdigin jáne úılesimdi damýyn qamtamasyz etý — bizdiń basty mindetimiz. Muny eske alatyn kez keldi, — dedi Asaıyn Baıhanov.

Eske sala keteıik, Mılana 17 qarasha kúni Ekibastuzdan 50 km jerdegi Besqaýǵa aýylynda joǵalyp ketti.

Osy kúni keshkisin saǵat 9:00 shamasynda qyzdyń anasy polıtsııaǵa shaǵym túsirdi. Mılanany eki táýlik boıy 400 adam izdedi.

Tipti izdeý jumystaryna tikushaq pen kınologtar da jumyldyryldy.

19 qarashada 7 jasar Mılananyń denesi qoqystan tabyldy.