7 jasar qaraǵandylyq qyz Little Miss World-2019 saıysyna attandy
QARAǴANDY. QazAqparat - Kishkentaı Aısha Ábenova Little Miss World-2019 halyqaralyq sulýlyq jáne talant baıqaýyna attandy, dep habarlaıdy QazAqparat tilshisi.
Kishkentaı sulýlar saıysy Túrkııada Bodrým qalasynda ótedi. Sol jerde sonymen qatar Photomodel world-2019 ataǵynyń jas ıegeri anyqtalady.
«Maǵan model bolý unaıdy jáne bolashaqta osy kásipti tańdaǵym keledi. Úsh jyldan beri bal jáne halyq bılerimen, mýzykamen aınalysamyn, fortepıanoda oınaımyn. Ótken jyly Mini Miss Karaganda-2018 baıqaýynda jeńiske jettim. Shynymdy aıtsam qatty qobaljydym. Meniń atymdy jarııalaǵan kezde, denem túrshigip ketti. Endi Qazaqstandy halyqaralyq baıqaýda tanystyratyn bolamyn», - deıdi 7 jasar Aısha Ábenova.
Búldirshin qyz Qaraǵandy qalasynyń № 45 gımnazııasynyń 1 synybynda oqıdy. Anasynyń aıtýynsha, bul Aıshanyń óner kórsetkeli otyrǵan besinshi baıqaýy. Ol Mini miss grand prix Russia-2018 tıtýlynyń ıegeri. Kishkentaı model kásibı agenttiktiń foto jáne beınetúsirilimine qatysady. Ótken jyly Qazaqstan Respýblıkasy Astanasynyń 20 jyldyǵyna arnalǵan «Ómir tarıhy» derekti fılmine de túsken.
«Aıshanyń alǵashqy fotosessııasy úsh jasynda boldy. Bári sol kezde bastaldy. Sodan keıin Qaraǵandy, Almaty jáne Máskeýde sulýlyq baıqaýlary boldy. Meniń tórt balam bar, olardyń ishinde Aısha eń belsendisi. Onyń qolynan barlyǵy keledi, biraq ol úshin kóp jumys isteý kerek. Bodrýmdaǵy konkýrsqa biz eki aıǵa jýyq daıyndaldyq, jeke bı bılep, ulttyq kostıým men keshki kóılek tiktirdik», - deıdi Zarına Ábenova.
Kishkentaı mıss tálimgeri Mádına Ahmetbaeva atap ótkendeı, halyqaralyq baıqaýda onyń shákirti ulttyq ónerge basa nazar aýdarady.
