7 jasar balanyń ólimine sebepker bolǵan Qyzylordalyq shekarashylarǵa qatysty sot úkimi shyqty
ShYMKENT. QazAqparat - Shymkentte 7 jasar balanyń ólimine sebepker bolǵan Qyzylordalyq shekarashylarǵa qatysty sot úkimi shyqty. Shymkent garnızony áskerı sotynda úsh kún boıy qaralǵan sot otyrysy barysynda bes shekarashy Qylmystyq kodekstiń 445 «Qazaqstan Respýblıkasynyń Memlekettik shekarasyn kúzetý jónindegi qaǵıdalardy buzý» jáne 462 «Qarý-jaraqpen, sondaı-aq aınaladaǵylarǵa qaýip tóndiretin zattarmen jáne nárselermen jumys isteý qaǵıdalaryn buzý» baptarymen aıypty dep tanylyp, túrli merzimderge sottaldy, dep habarlaıdy QazAqparat HAA tilshisi.
Atap aıtqanda, Qyzylorda shekara otrıady 2019 áskerı bóliminiń aǵa leıtenanty Rahymjan Túzelov 1 jylǵa bas bostandyǵynan aıyryldy. Jazasyn qonys kolonııasynda óteıtin boldy. Al, onyń qaramaǵyndaǵy tórt shekarashyǵa 1 jyl shartty jaza taǵaıyndaldy. Kináli dep tanylǵan shekarashylardyń barlyǵynyń da áskerı sheni tartyp alyndy. 
Eske salaıyq, oqys jaǵdaı osy jyldyń 8-shi aqpan kúni bolǵan edi. Oıyn balasy ákesiniń qyzmettik qarýynan ajal qushqan. Osy oqıǵaǵa qatysy bar bes shekarashynyń ústinen qylmystyq is qozǵalyp, tergeý sharalary júrgizilgen bolatyn. Sot otyrysy barysynda qarýdan qaza tapqan balanyń ata-anasy shekarashylarǵa keshirim bergen edi. Alaıda, bul áskerılerge jaza taǵaıyndaýǵa kedergi keltirmedi. 
