7 jasar bala Jaıyq ózenine qulap ketti
ATYRAÝ. QazAqparat – Atyraýlyq azamat Jaıyq ózenine qulaǵan 7 jasar balany qutqardy, dep habarlaıdy QazAqparat.
Oblystyq Tótenshe jaǵdaılar departamenti baspasóz qyzmetiniń aqparatyna qaraǵanda, bul oqys oqıǵa 6 qazanda «Beıbarys» kópiriniń astynda qaraýsyz júrgen 7 jasar bala Jaıyq ózenine qulaǵan.
«Departamenttiń dıspetcherlik pýltine saǵat saǵat 12:02-de balanyń sýǵa qulap ketkeni týraly habar tústi. Oqıǵa ornyna jedel qutqarý jasaǵynyń qutqarýshylary jetken kezde jergilikti azamat Asanáli Tasqalıevtyń balany qutqaryp, aýrýhanaǵa alyp ketkeni anyqtaldy. Bul azamat nemeresimen Jaıyq jaǵasynda kele jatqanda qarsy jolyqqan eki bala dosynyń sýǵa qulaǵanyn aıtyp, kómek suraǵan. Ol sýdaǵy balany balyq aýlaýshylardyń qarmaǵymen ilip, jaǵaǵa alyp shyqqan. Sýǵa tunshyqqan balaǵa alǵashqy medıtsınalyq kómek kórsetken» dep habarlady departamenttiń baspasóz qyzmeti.
Asanáli Tasqalıevtyń aıtýynsha, balany aman alyp qalý úshin qolynan kelgenniń bárin jasaǵan.
«Balanyń pýlsi bar ekenin baıqadym. Dereý alǵashqy kómek kórsetip, aýyz qýysyn tazaladym. Bir kezde bala jylaı bastady. Qasymdaǵy joldas jigitpen birge taksı avtokóligin toqtatyp, jaqyn jerdegi №5 qalalyq emhanaǵa jetkizdik» -deıdi ol.
Qazir qutqarylǵan bala oblystyq balalar aýrýhanasynyń jansaqtaý bóliminde jatyr. Dárigerler oǵan «mıdyń isinýi» dıagnozyn qoıǵan.
Departamenttiń málimetine súıensek, balalardyń Jaıyq ózeniniń jaǵasynda oınap, ómirine qaýip tóndirýdi azaımaı otyr. Bıylǵy jyl basynan beri 27 adam sýǵa ketken. Onyń ishinde 4 bala bar.
