7 jasar Amır Aıdarhanov álem chempıonatynyń altyn júldesin ıelendi
TALDYQORǴAN. KAZINFORM - Taldyqorǵan qalasynyń 2 synyp oqýshysy Birikken Arab Ámirlikteriniń astanasy Ábý-Dabıde ótken álem chempıonatynan altyn aldy. Jekpe-jektiń djıý-djıtsý túrinen jarysqa qatysqan jetisýlyq 9 sportshynyń 8-i elge júldemen oraldy.
Qarashanyń 3-9 aralyǵynda Arab ámirliginde ótken Abu Dhabi WORLD JIU-JITSU CHAMPIONSHIP 2024 týrnırine Jetisýdan 9 jas sportshy barǵan. Júlde alǵandardyń arasynda eń kishisi – Amır Aıdarhanov.
Ol Taldyqorǵan qalasyndaǵy N.Ostrovskı atyndaǵy N 8 orta mektepte oqıdy. 2 synyp oqýshysynyń djıý-djıtsýdyń ne-vaza túrimen shuǵyldanǵanyna 2 jyldaı bolǵan. Osy aralyqta qalalyq, respýblıkalyq, halyqaralyq týrnırlerdiń jeńimpazy atanyp úlgergen.
«Amır – úıdiń kishisi. Sportqa bergenime kóp bolǵan joq. Nátıjesi jaqsy. Sabaǵyn da jaqsy oqıdy. Alǵashynda jarysqa barǵanda qobaljıtyn. Qazir úırendi. Kerisinshe ulym kilemge shyqqanda meniń qol-aıaǵym dirildep, qatty tolqımyn. Chempıon atanǵandaǵy qýanyshymdy sózben jetkize almaımyn. Jattyqtyrýshysyna alǵys aıtamyn. Óte rızamyz», - dedi ákesi Aıdyn Aıdarhanov.
7 jasar Amır álem chempıonatynda 26 keli salmaqta óner kórsetken. Jas ereksheligine qaraı 2 jekpe- jek ótkizip, chempıon atanǵan.
«Taldyqorǵannan 9 bala aparǵanbyz. Álem chempıonatynan 5 altyn, 1 kúmis, 2 qolamen 8 shákirtimiz júldeli qaıtty. Týrnır 4-18 jas aralyǵynda ótti. Amırdiń qarsylastary óte myqty boldy. Aıtqan aqyl-keńesterimizdi tyńdap, sátti oryndap shyqty», - deıdi jattyrýshy Dıas Eshmuhamedov.
Álemniń 50-ge jýyq elinen 9 500 sportshy qatysqan halyqaralyq týrnırde Qazaqstan qurama komandasy jalpykomandalyq esepte 1-orynǵa qol jetkizdi.
Eske salaıyq buǵan deıin bokstan álem chempıony atanǵan Arýjan Zeınýllaevaǵa aýyldastary at mingizip, qurmet kórsetkenin jazǵanbyz.
