7 zań Konstıtýtsııaǵa sáıkes kelmeıdi dep tanyldy – Konstıtýtsııalyq sot
ASTANA. KAZINFORM – Jeti zańnyń jáne Joǵarǵy sottyń bir normatıvtik qaýlysynyń erejeleri Konstıtýtsııaǵa sáıkes kelmeıdi dep tanyldy. Bul týraly Parlament palatalarynyń birlesken otyrysynda Konstıtýtsııalyq sot tóraǵasy Elvıra Ázimova aıtty.
«Konstıtýtsııalyq normalardyń saqtalmaýyna baılanysty jeti zańnyń jáne Joǵarǵy sottyń bir normatıvtik qaýlysynyń erejeleri Konstıtýtsııaǵa sáıkes kelmeıdi dep tanyldy», - dedi Elvıra Ázimova.
Onyń aıtýynsha, atalǵan qujattar mynalar:
– Salyq kodeksiniń 610-baby 2-tarmaǵy – talap qoıý aryzdaryn bergeni úshin memlekettik bajdyń belgilengen mólsheri bóliginde jáne ákimshilik talap qoıý kezinde sot arqyly qorǵaýyna konstıtýtsııalyq quqyqqa nuqsan keltirýge jáne shekteýge ákep soǵatyn ereje (joıyldy);
– Memlekettik qyzmet týraly zańnyń 16-baby 3-tarmaǵynyń 6) jáne 14-tarmaqshalarynyń, áskerı qyzmet jáne áskerı qyzmetshilerdiń mártebesi týraly Zańnyń 38-baby 2-tarmaǵynyń 11) tarmaqshasynyń, quqyq qorǵaý qyzmeti týraly Zańnyń 6-baby 2-tarmaǵynyń 9) tarmaqshasynyń erejeleri – memlekettik qyzmet pen memlekettik basqarý múddelerine qarsy quqyq buzýshylyqtar úshin tártiptik, ákimshilik jáne qylmystyq jaýaptylyq sharalarynan týyndaıtyn quqyqtyq shekteýlerdiń sáıkessizdigine baılanysty memlekettik qyzmetke kirýge merzimsiz tyıym salýdy belgileý;
– sybaılas jemqorlyqqa qarsy is-qımyl týraly Zańnyń 13-baby – Konstıtýtsııada belgilengen maqsattarǵa naqty aıqyndalǵan quqyqtyq baılanystyń bolmaýynan kásipkerlik qyzmet bostandyǵyna konstıtýtsııalyq quqyqty shekteýdi belgileý;
– Qylmystyq-atqarý kodeksiniń 141-babynyń úshinshi, besinshi bólikteri jáne altynshy bóliginiń 1) tarmaqshasy – kúshine engen sot úkimi negizinde bas bostandyǵynan aıyrý jazasyn ótep jatqan sottalǵandardyń týystarymen qysqa merzimdi jáne uzaq merzimdi kezdesýleriniń ártúrli sanyn belgileý (joıyldy);
– Joǵarǵy Sottyń №2 normatıvtik qaýlysynyń erejesi – sotqa bala asyrap alý týraly aryz bergen kezde sotqa júginýge konstıtýtsııalyq quqyqty shekteıtin jáne balanyń múddelerin barynsha qamtamasyz etý memleketiniń mindettemesine sáıkes kelmeıtin molekýlıarlyq-genetıkalyq saraptamanyń qorytyndysyn usyný týraly ımperatıvti talapty belgileý (joıyldy);
– Qylmystyq is júrgizý kodeksiniń 482-babynyń birinshi bóligi – qorǵaýshynyń kassatsııalyq is júrgizýde jáne úkimdi oryndaý satysynda sottalǵannyń quqyqtary men múddelerin bildirý ókilettigin shekteý.
«Qazirgi ýaqytta anyqtalǵan quqyqtyq qaıshylyqtar eki zańda jáne Joǵarǵy Sottyń normatıvtik qaýlysynda joıyldy. Memlekettik qyzmetke jáne onyń erekshe túrlerine, sybaılas jemqorlyqqa qarsy, sondaı-aq qorǵaýshynyń kassatsııalyq is-júrgizýdegi ókilettigine qatysty máseleler boıynsha tıisti zań jobalary Parlamentte qaralýda», - dedi Konstıtýtsııalyq sot tóraǵasy.
