7 shildede elordada Dombyra kúni toılanady
Osyǵan oraı Qazaq eli monýmentiniń aldyndaǵy alań byltyrǵydaı úlken sahnaǵa aınalady. Sharaǵa jas ereksheligine qaramastan nıet bildirgenderdiń barlyǵy qatysa alady. Olar «Saryarqa», «Adaı», «Álqıssa», «Kóńil tolqyny», «Balbyraýyn» jáne «Kóreǵuly» kúılerin jatqa bilýge tıis. Sharaǵa qatysý úshin 1 maýsymnan 5 shildege deıin asyldombyra.kz saıtynda onlaın tirkelý kerek. Kontsert saǵat 12:00-de bastalady.
«Bıyl Ulttyq Dombyra kúnine oraılastyrylǵan jappaı kontsertte oryndalatyn alty kúı tańdaldy. Árıne, qatysýshylardyń alty kúıdi de bilgeni jón Degenmen usynylǵan kompozıtsııalardyń bireýin ǵana biletinder de kontsertke úles qosa alady», - dep habarlady Nur-Sultan qalasynyń mádenıet jáne sport basqarmasynan.
7 shildede mereke barysynda kúmbirlegen kúıden basqa, jınalǵandar nazaryna «Jastar» teatrynyń akterleri tarıhı qoıylym usynady, elordalyq mýzyka mektepteriniń shákirtteri óz ónerlerin ortaǵa salady, aqyndar aıtysy ótedi. Sýyryp salma óleńge ysylǵan jandar ulttyq mýzykalyq aspabymyz - dombyrany jyrǵa qosady. Sonymen qatar, «Qazaq Eli» monýmentiniń aldyndaǵy alańda kıiz úıler tigilip, qazaq aýyly oryn tebedi. Kelýshiler dombyranyń jáne basqa da ulttyq aspaptardyń túr-túrimen tanysa alady.
Sonymen qatar, mereke keshke Esil ózeniniń jaǵasyndaǵy Amfıteatrda «Naǵyz qazaq - dombyra» kontsertimen jalǵasyn tabady. Sahna tórinde Qazaq orkestri, Nur-Sultan qalasy ákimdiginiń Memlekettik akademııalyq fılarmonııasynyń solısteri men vokalısteri óner kórsetedi. Kontserttiń bastalýy saǵat 18.00-de. Kirý - tegin.
Eske salaıyq, ótken jyly Ulttyq Dombyra kúnine oraı «Qazaq Eli» monýmentiniń aldyndaǵy alańda dombyranyń qulaǵynda oınaıtyn 2 myńnan asa ónerpazdan qurylǵan orkestr óz ónerin ortaǵa saldy. Fleshmobqa qatysý úshin elimizdiń óńirlerinen de dombyrashylar elordaǵa at basyn tiredi. Sharany Elbasy Nursultan Nazarbaev tamashalady. Aıta keteıik, bul qala tarıhyndaǵy aıtýly oqıǵa boldy. «Kóńil ashar», «Adaı», «Balbyraýyn», «Erke Sylqym» jáne «Saryarqa» kúılerin oryndaǵan dombyrashylarǵa QR eńbek sińirgen qaıratkeri, kompozıtor Aıtqalı Jaıymov dırıjerlik etti. 1 shildede ótken Ulttyq Dombyra kúnine arnalǵan kontsertke belgili mýzykanttar, qoǵam jáne memleket qaıratkerleri, onyń ishinde QR Parlamenti Májilisiniń depýtaty Bekbolat Tileýhan, Nur-Sultan qalasynyń mádenıet jáne sport basqarmasynyń basshysy Bolat Majaǵulov, Qazaqstannyń eńbek sińirgen artısi Aıgúl Úlkenbaeva, Nurken Áshirov, dırıjer Arman Júldebaev, «Bastaý» toby, «Serper», «Asyl toby», «Mýzart», Asylbek Eńsepov jáne basqalary qatysty. Aıta keteıik, byltyr qatysýshynyń eń kishkentaıy 7 jasta, al eń úlkeni - 75-te boldy. Shara barysynda eń jas qatysýshyǵa Elbasy óz qolymen dombyra tartý etti.
Ulttyq dombyra kúni 2018 jyly Qazaqstan Respýblıkasynyń Tuńǵysh Prezıdentiniń Jarlyǵymen bekitildi jáne jyl saıyn shildeniń birinshi jeksenbisinde atalyp ótiledi.
