7-shi Qysqy Azııa oıyndarynyń qatysýshylaryn qabyldaıtyn Astana qalasynyń qonaq úıleri sapaǵa saı emes - V.Júnisova
ASTANA. Tamyzdyń 17-si. QazAqparat /Gúlmıra Álıakparova/ - 2011 jylǵy 7-shi Qysqy Azııa oıyndarynyń qatysýshylaryn qabyldaıtyn Astana qalasynyń qonaq úıleri sapaǵa saı emes. Bul týraly búgin Astanada «3S sapa brendi» jobasynyń tusaýkeserine arnalǵan shara barysynda «Elordalyq týrızm qaýymdastyǵy» Zańdy tulǵalar birlestigi dırektorynyń mindetin atqarýshy Vıktorııa Júnisova málim etti.
«Elordalyq týrızm qaýymdastyǵy» 7-shi Qysqy Azııa oıyndaryn ótkizýge qatystyrylatyn qonaq úılerdi tańdaý boıynsha komıssııanyń músheliginde boldy. Ókinishke qaraı, qonaq úılerdiń deniniń qyzmetkerleri sheteldik qonaqtardy qarsy alyp, kútýge múldem daıyn emes bolyp shyqty. Al shet el tilderin meńgergenderi joqtyn qasy. Nátıjesinde, biz Astana qalasynyń ákimdigine óz usynys-pikirlerimizdi joldadyq», - dep atap ótti V.Júnisova.
V.Júnisovanyń sózine qaraǵanda, shet el qonaqtarynyń ózi astanalyq qonaq úıler men meıramhanalardaǵy qyzmetterdiń sapasy baǵaǵa sáıkes kele bermeıtinin aıtýda. Bul túıitkil týraly Elbasy N.Nazarbaev ta birneshe márte aıtqan bolatyn.
Osy rette, Azıadaǵa daıyndyq jáne Astana qalasyndaǵy týrıstik qyzmetter kórsetetin jalpy nysandardyń sapasyn arttyrý maqsatynda, elorda ákimdigi men Elordalyq týrızm qaýymdastyǵy «3S sapa brendi» jobasyn ázirledi. Joba aıasynda arnaıy komıssııa týrıstik nysandardyń deńgeıi men olardyń jalpy jaǵdaıyna baǵa bere otyryp, qyzmet kórsetý sapasyn arttyrý úshin jattyǵý-trenıngter ótkizetin bolady. Komıssııanyń sheshimi boıynsha «3S sapa brendine» tolyǵymen sáıkes keledi dep tanylǵan nysandarǵa sımvoldyq beınelemeler men arnaıy atrıbýttar tabys etiledi.
Buǵan deıin habarlanǵandaı, qysqy Azıada oıyndaryna 1500-ge jýyq shet eldik sportshylar men bapkerler keledi dep kútilýde. Aıta keteıik, osydan tórt jyl buryn 2007 jyly Qytaıda ótken Azıadaǵa 800 sportshy qatysqan bolatyn. Azııa qurlyǵynda ornalasqan 45 eldiń 30-y 2011 jyly Qazaqstanda ótetin 7-shi Qysqy Azııa oıyndaryna qatysýǵa nıet bildirip otyr. Onyń ishinde 27-si - musylman elderi bolǵandyqtan, Astana men Almatynyń qonaq úılerin halal standarttaryna saı keltirý boıynsha jumystar júrgizilýde.
