7-shi Qysqy Azııa oıyndarynyń Alaý qutysynyń tusaýkeseri oıyndardyń saltanatty ashylýyna 100 kún qalǵanda ótkiziledi
ASTANA. Qyrkúıektiń 2-si. QazAqparat /Gúlmıra Álıakparova/ - 7-shi Qysqy Azııa oıyndarynyń Alaý qutysynyń tusaýkeseri, oıyndardyń saltanatty ashylýyna 100 kún qalǵanda, ıaǵnı qazannyń 22-si kúni ótkiziledi. Bul týraly búgin QazAqparat tilshisine bergen suhbatynda Azııa oıyndary Alaý Estafetasy dırektsııasy basshysynyń orynbasary Sársen Quranbek málim etti.
«Azııa oıyndarynyń Alaý qutysynyń tusaýkeseri qazannyń 22-si kúni ótkiziletin bolady. Esterińizde bolsa, barlyq Olımpıada oıyndarynda quty oıyndarǵa 100 kún qalǵan kezde jaǵylady. Bul qalyptasqan dástúr», - deıdi ol.
S.Quranbek atap kórsetkendeı, qutynyń tusaýkeseri áserli úlken shoý baǵdarlamanyń súıemeldeýimen Astanadaǵy Táýelsizdik saraıynda ótedi. «Sharanyń mańyzy da, jaýapkershiligi de joǵary bolǵandyqtan oǵan tyńǵylyqty daıyndyqtar búginnen júrgizilýde», - dedi.
Dırektsııa ókiliniń sózine qaraǵanda, Azıada Alaýynyń qutysy áli daıyn emes.
Buǵan deıin habarlanǵandaı, Alaý qutysy men onymen birge Estafeta barysynda óńirlerdi birge aralaıtyn - jyljymaly qazandyqty daıyndaý, olımpıadalyq oıyndardyń atrıbýtıkalaryn ázirleýmen aınalysatyn qytaılyq kompanııaǵa tapsyryldy.
Qutynyń salmaǵy 1 keli 350 gramm shamasynda, uzyndyǵy - 65-66 santımetr. Fakel tústi metaldardyń qospasynan daıyndalýda jáne ol aýa raıynyń barlyq jaǵdaıyna tózimdi bolady. Onyń dızaınynyń negizine Almaty mańynda tabylǵan, bizdiń jyl sanaýymyzǵa deıingi І-ІІІ ǵ. jatatyn saqtardyń jaryqtandyrǵysh quraly alyndy. Ulttyq naqyshtar jyljymaly qazandyqta da bederlenetin bolady.
