7-shi Qysqy Azııa oıyndary alaýynyń fakeli aldaǵy qyrkúıek aıynda tanystyrylady
ASTANA. Tamyzdyń 5-i. QazAqparat /Gúlmıra Álıakparova/ - 7-shi Qysqy Azııa oıyndary alaýynyń fakeli aldaǵy qyrkúıek aıynda tanystyrylady. Bul týraly búgin QazAqparat tilshilerine bergen suhbatynda Azııa oıyndary Alaý estafetasynyń dırektsııasy basshysynyń orynbasary Sársenbek Quranbek málim etti.
«Ózderińizge málim, qysqy Azııa oıyndarynyń tarıhynda tuńǵysh ret Olımpıada Alaýy estafetasy ótkiziledi. Alaý estafetasy qańtardyń 11-i kúni Azııa Olımpıadalyq keńesiniń shtab-páteri ornalasqan Ál-Kýáıt qalasynda teatrlandyrylǵan qoıylym barysynda tutandyrylyp, qazaqstandyq uıymdastyrýshy komıtet ókilderine saltanatty túrde tabys etiledi. Qańtardyń 12-si kúni elimizge jetkiziletin alaý, 20 kún boıy Qazaqstannyń túkpir-túkpirin aralaıdy da, qańtardyń 30-y kúni Astanadaǵy «Astana-Arena» stadıonynda Oıyndardyń saltanatty ashylýyna jetkiziledi», - dep atap ótti ol.
S.Quranbektiń aıtýynsha, ústimizdegi mamyr aıynyń 28-i kúni Azııa Olımpıadalyq keńesiniń prezıdenti Sheıh Ahmad Ál-Fahd Ál Sabah 7-shi Qysqy Azııa oıyndarynyń Alaý estafetasynyń reglamentin, baǵyty men atrıbýtıkasyn bekitti. Sondaı-aq bekitilgen jospar qazaqstandyq uıymdastyrý komıtetiniń tóraǵasy, QR Premer-Mınıstri Kárim Másimovke usynylyp, maquldandy.
«Sońǵy anyqtalǵan málimetter boıynsha, alaý fakeliniń salmaǵy 1 kılá 350 gramm shamasynda, al uzyndyǵy 65-66 santımetr bolady. Ony daıyndaý olımpıadalyq oıyndardyń atrıbýtıkasyn daıyndaýmen aınalysatyn qytaılyq kompanııaǵa tapsyryldy. Fakel tústi metaldardyń qospasynan daıyndalady jáne ol aýa raıynyń barlyq jaǵdaıyna tózimdi bolady. Fakel Qazaqstanǵa tamyz aıynyń sońynda jetkiziledi, onyń tusaýkeserin qyrkúıek aıynda Astanada ótkizýdi josparlap otyrmyz», - dedi S.Quranbek.
Buǵan deıin habarlanǵandaı, fakel dızaıny Almaty mańynda tabylǵan, bizdiń jyl sanaýymyzǵa deıingi І-ІІІ ǵ. jatatyn saqtardyń jaryqtandyrǵysh quraly negizinde jasalǵan.
