7 sáýirden bastap Qanysh Sátbaev kanalynan Shiderti alqabyna sý bosatylady
PAVLODAR. KAZINFORM — Sý jiberý sharalary shamamen eki aıǵa ulasady. Mamandar Ekibastuzdyń aýyldyq aımaǵy men Aqtoǵaı aýdany boıynsha 21 myń gektardan astam shabyndyqty sý basady degen úmitte.
Pavlodar oblysynda Shiderti ózenine sý jiberile bastaıdy. Jyl saıynǵy dástúrli shara aıasynda Ertis ózenine jalǵanǵan Qanysh Sátbaev atyndaǵy kanaldan úlken kólemde sý bosatylady. Bul Aqkól-Jaıylma alqabyndaǵy ekojúıeni qalpynda saqtap, aýyl sharýashylyǵy salasyn qajetti mólsherde jem-shóppen qamtamasyz etedi.
— Ońtaıly aýa raıy jaǵdaılary men topyraq ylǵaldylyǵynyń jaı-kúıin eskere otyryp, 7 sáýirden bastap Qanysh Sátbaev atyndaǵy kanaldan Shiderti ózenine tabıǵatty qorǵaý jáne sanıtarlyq-epıdemıologııalyq sý jiberý bastalady. Bekitilgen kólem 120 mln tekshe metr, byltyrǵy deńgeıde saqtalyp otyr. Jalpy, sý jiberý esebinen Ekibastuz qalasynyń aýyldyq aımaǵy men Aqtoǵaı aýdanynda ornalasqan 21 myń gektardan astam shabyndyq alqaptaryn sý basady dep boljanyp otyr. Sý jiberýdiń barlyq kezeńin merdiger uıym jáne oblys ákimdigi baqylaıtyn bolady, — dep habarlady Pavlodar oblysynyń jer qoınaýyn paıdalaný, qorshaǵan orta jáne sý resýrstary basqarmasynyń basshysy Saǵyn Tóleýtaev.
Kanaldan sý bosatý sharalarynyń jalpy uzaqtyǵy eki aıǵa ulasyp, sý Shiderti ózeni arqyly keń dalaǵa jóńkilip, shabyndyq úshin paıdalanylatyn kóltabandardy, Aqkól-Jaıylmadaǵy Áýlıekól kólder júıesin (shamamen 9 kól bar) tolyqtyryp, balyq resýrsyn qalpyna keltirýge oń áserin tıgizedi. Ekinshi turǵydan bul aýmaqtardyń tabıǵı balansyn ustap turýǵa, ekologııalyq ahýaldy jaqsartýǵa negizdelgen.
Eske sala keteıik, byltyr Sátbaev kanalynan Shiderti ózeni jaıylmasyna rekordtyq kólemde sý jiberilgen bolatyn. Rekordtyq deńgeı bıyl da saqtalady.
Sondaı-aq byltyr Shiderti lımandy sýarý júıesinde 500 metrden astam bóget nyǵaıtyldy.