7 ret sottalyp jazasyn ótegen adam taǵy da ustaldy- Almaty oblysy
TALDYQORǴAN. QazAqparat - Almaty oblysynyń polıtseıleri retsıdıvıst urylardan quralǵan qylmystyq toptyń jolyn kesti. Kúdiktilerdi ustaýǵa oblystyń polıtseılerinen ózge Іshki ister mınıstrliginiń «Suńqar» jasaǵy da jumyldyrylǵan, dep habarlaıdy QazAqparat tilshisi.
Almaty oblystyq Polıtsııa departamentindegi baspasóz qyzmetiniń málimetinshe, demalys kúnderi tártip saqshylar Eńbekshiqazaq aýdany aýmaǵynda jergilikti polıtseılerdiń, oblystyq departamenttiń jáne QR Іshki ister mınıstrligi «Suńqar» arnaıy bólimshesi jasaǵynyń qatysýymen jedel is-sharalar ótkizdi. Nátıjesinde Qaınazar aýylyndaǵy kezekti urlyqtarynan keıin boıtasalaýǵa tyrysqan quramynda 4 er adam bar qylmystyq top ustaldy.
«Kúdiktilerdi ustaý kezinde olardyń avtokóliginen Qaınazar aýylyndaǵy úıden qoldy bolǵan zattar tabylyp, tárkilendi. Tárkilengen zattar ishinde zergerlik buıymdar, ańshy myltyǵy, ulttyq jáne sheteldik valıýtadaǵy aqshalar, sondaı-aq qylmys jasaýǵa paıdalanǵan betperdeler, qolǵaptar men quraldar bar. Tergeý barysynda kúdiktilerdiń biri kisi ólimi men urlyq úshin eki ret qylmystyq jaýapkershilikke tartylsa, ekinshisi ártúrli qylmystar úshin jeti ret sotty bolyp, ómiriniń 20 jylǵa jýyǵyn temir tordyń arǵy jaǵynda ótkizgeni anyqtaldy»,- dep atap ótti oblystyq polıtsııa ókilderi.
Ustalǵan azamattar 2018 jyldyń kúzinen beri oblys aýmaǵynda oryn alǵan ózgeniń múlkin urlaýdyń kóptegen derekterine qatysy bar degen kúdikke ilinip otyr. Qazirgi ýaqytta olardyń zardap shegýshilerge mıllıondaǵan teńge materıaldyq shyǵyn keltirgen Esik qalasy, Qaınazar, Eńbek jáne Avat aýyldarynda tirkelgen 15 astam urlyqqa qatysy bary dáleldendi.
«Qazirgi tańda tergeýdiń qajetti sharalary, ıaǵnı jaýap alý, kórsetýler, qaraý, urlanǵan múlikti izdeý jáne t.b. amaldary júrgizildi. Tergeý materıaldarynda birneshe urlyq deregine qatysty aıǵaqzattar bar. Sondaı-aq, bul isti tergeýge oblystyq Polıtsııa departamentiniń jedel ýákilderi men tergeýshileri qosyldy. Oblystyq polıtsııa basshylyǵy osy urlyq tobyna qatysty isti qatań baqylaýyna aldy»,- dep atap ótti vedomstvonyń baspasóz qyzmeti.
Qazir osy faktige oraı, QR Qylmystyq kodeksiniń 188-babyna sáıkes «Іri mólsherde jasalǵan urlyq» derekteri boıynsha sotqa deıingi tergeý amaldary júrgizilýde. Eki kúdiktige qatysty mekenjaıyn ózgertpeý týraly mindetteme toltyrylsa, buǵan deıin birneshe ret qylmystyq jaýapkershilikke tartylǵan eki kúdikti Eńbekshiqazaq aýdany polıtsııasynyń ýaqytsha ustaý oqshaýlaǵyshyna qamaldy.
