7 protsenttik ıpoteka: Jańa baǵdarlama aıasynda qansha páter salynady

ASTANA. QazAqparat - QR Investıtsııalar jáne damý mınıstrliginiń esebine sáıkes, "7-20-25" baǵdarlamasy arqasynda qazaqstandyqtardyń birazy baspana máselesin sheshe alady, dep habarlaıdy QazAqparat tilshisi.

"Bizdiń esebimiz boıynsha (jyl saıyn - avt.) 100 000 páter, 5 mıllıon sharshy metr jańadan qurylys nysandary salynady degen sóz. Nesıe berý jaǵynan da úlken serpilis bolady. Sosyn turǵyn úı salý qurylysynda da úlken serpilis bolady. Endi, bul jerde eń jaýapty mekeme ol - Ulttyq bank. Bizdiń mınıstrlik te birge jumys jasaıtyn bolady", - dedi Qurylys isteri jáne turǵyn úı kommýnaldyq sharýashylyq komıtetiniń tóraǵasy Marxabat Jaıymbetov QazAqparat tilshisine bergen suxbatynda.

Komıtet basshysynyń aıtýynsha, jańa baǵdarlamaǵa bir trıllıon teńge tartylsa, turǵyn úı salasynda biraz sharýany tyndyryp tastaýǵa bolady. Endigi kezekte Ulttyq banktiń janynan arnaıy kompanııany quryp, tezdetip jumysqa kirisý kerek.

Aıta keteıik, Parlament palatalarynyń birlesken otyrysynda Memleket basshysy Nursultan Nazarbaev qazaqstandyqtardy baspanamen qamtamasyz etýdiń jańa baǵdarlamasyn ázirleýdi tapsyrdy. Osyǵan baılanysty QR Ulttyq banki janynan 7 protsenttik ıpotekany beretin jańa kompanııa qurylady.  QR Investıtsııalar jáne damý mınıstri Jeńis Qasymbektiń aıtýynsha, arzan ıpoteka bárine jetedi.