7 óńirde sporttaǵy daryndy balalarǵa arnalǵan mektep-ınternet ashylady
ASTANA. KAZINFORM — 7 óńirde sporttaǵy daryndy balalarǵa arnalǵan mektep-ınternet ashylady. Bul týraly Úkimet otyrysynda Sport jáne týrızm mınıstri Erbol Myrzabosynov aıtty.
- Qazir 13 óńirde sporttaǵy daryndy balalarǵa arnalǵan 14 oblystyq mektep-ınternat jumys isteıdi. Tujyrymdamaǵa sáıkes, qalǵan jeti óńirde osyndaı ınternattar ashý kózdelgen. Atyraý oblysynda memlekettik-jekeshelik áriptestik arqyly sport ınternatynyń qurylysy boıynsha konkýrstyń birinshi kezeńi ótti. Shartqa qol qoıý 2025 jyldyń jeltoqsanynda josparlanǵan. Óńirlerge osy tájirıbe negizinde sport mektep-ınternat-kolledjderin ashý úshin memlekettik-jekeshelik áriptestik tetikterin qarastyrý usynylady, - dedi mınıstr.
Ol múmkindigi shekteýli jandardyń sportpen shuǵyldanýyna jaǵdaı jasaýǵa erekshe kóńil bólinetinin aıtty.
- Oralda tennıs, trenajer jáne oıyn zaldaryn qamtıtyn «Freedom Shapaǵat» korporatıvtik qorynyń qarajaty esebinen sport zaly ashyldy. Aqtóbede basseıni, kúres zaldary men trenajerleri bar sport kesheni salynyp jatyr. Paıdalanýǵa berý 2025 jyldyń jeltoqsanynda josparlanyp otyr. Jetisý oblysynyń Taldyqorǵan qalasynda sport keshenin salý úshin jobalaý-smetalyq qujattama ázirlendi, - dedi ol.
Erbol Myrzabosynovtyń aıtýynsha, Úkimettiń qoldaýy arqasynda Arnaıy memlekettik qordyń qarajaty tartylyp jatyr. Atalǵan qarajat esebinen Aqmola oblysynyń Zerendi aýylynda balalar men jasóspirimder sport mektebiniń qurylysy aıaqtaldy. Qazirgi ýaqytta Astanadaǵy Munaıtpasov atyndaǵy stadıon, Almaty oblysyndaǵy sport kesheni, Kókshetaýdaǵy kópbeıindi keshen salynyp jatyr.
- Respýblıkalyq bıýdjet komıssııasyna jalpy quny 39,2 mlrd teńge bolatyn 6 nysan boıynsha ótinim joldandy, - dedi mınıstr.
Sondaı-aq, onyń dereginshe, elimizdiń óńirlerinde 14 jańa stadıon salý qajet.