7 óńirde egistikti kıikterden qorǵaıtyn kezekshi toptar quryldy
ASTANA. KAZINFORM – Elimizdiń 7 óńirinde egistikti kıikterden qorǵaý úshin 557 adam men 182 tehnıka jumyldyryldy. Bul týraly Ekologııa jáne tabıǵı resýrstar mınıstrliginen málim etti.
- 2025 jylǵy eseptik derekter boıynsha Qazaqstan aýmaǵynda kıikterdiń jalpy sany 3 mln 978 myń basqa jetip, tarıhı eń joǵarǵy kórsetkishten (1974 jyly 1,2 mln bas) aıtarlyqtaı asyp tústi. Kıikter sanynyń artýyna baılanysty fermerlerdiń egistik alqaptary taptalynady. Bul da olardyń ónimniń bir bóligin joǵaltýyna ákeledi. Egistik jerlerdi kıikterdiń taptaýynan qorǵaý jáne fermerlerge qoldaý kórsetý maqsatynda 7 óńirde oblys ákimderiniń orynbasarlary basqaratyn jedel shtabtar quryldy. Aýyl sharýashylyǵy jerlerine ınspektorlyq quram tarapynan patrýldik baqylaý uıymdastyryldy. Sondaı-aq vahtalyq ádispen kezekshilik engizildi, - dedi vedomstvodan agenttiktiń saýalyna oraı.
Mınıstrlik málimetinshe, kezekshilikke barlyǵy 557 adam men 182 tehnıka jumyldyrylǵan. Onyń ishinde Ekologııa jáne tabıǵı resýrstar mınıstrliginen 431 adam men 127 tehnıka, jergilikti atqarýshy organdardan 126 adam men 55 tehnıka bar.
- Kezekshi toptar aýyl sharýashylyǵy jerlerinde táýlik boıy qyzmet atqaryp, kıikterden egistik jerlerdi qorǵaýmen aınalysady. Qazirgi tańda Ekologııa jáne tabıǵı resýrstar mınıstrliginiń tapsyrysymen Zoologııa ınstıtýty kıik sanyn retteýdiń ǵylymı negizdemesin ázirledi. Atalǵan negizdeme boıynsha Úkimet kıik popýlıatsııasyn retteý týraly sheshim qabyldaıdy. Sonymen qatar múddeli memlekettik jáne jergilikti atqarýshy organdarmen birlese otyryp, kıik sanyna baqylaý júrgizý baǵytynda jumystar júrgizilýde, - dedi Ekologııa mınıstrligi.
Buǵan deıin Ekologııa mınıstri Erlan Nysanbaev kıik sanyn retteýge, aýlaýǵa qatysty ǵalymdardyń bıologııalyq negizdemesi daıyn bolǵanyn aıtqan edi.
- Zoologııa ınstıtýtynyń resmı bıologııalyq, ǵylymı negizdemesin aldyq. Kıik sanynyń 20 paıyzy retteýge jatady, - degen edi ol.