7 óńirdegi statsıonarlyq-medıtsınalyq kómek sapasy jaqsaratyn bolady

ASTANA. QazAqparat - Elimizdiń 7 óńirinde statsıonarlyq-medıtsınalyq kómek sapasy jaqsaratyn bolady. Bul týraly búgin "Nur Otan" partııasynyń kezekti XVIII sezinde Elbasy Nursultan Nazarbaev aıtty, dep habarlaıdy QazAqparat tilshisi.

"Elimizdiń árbir turǵyny bilimdi bolýmen qatar deni saý bolý tıis. Turǵylyqty jerine qaramastan sapaly densaýlyq saqtaýǵa qoljetimjdilikti qamtamasyz etý qajet. Otandyq medıtsına eń aldymen aldyn alýǵa jáne salaýatty ómir saltyn yntalandyrýǵa baǵyttalýy tıis. Qoǵamdyq densaýlyq saqtaý, alǵashqy medıtsınalyq-sanıtarlyq kómek qyzmetteriniń shyǵystary densaýlyq saqtaýdyń jalpy qarjylandyrylýynyń 40 paıyzynan 60 paıyzǵa deıin arttyrylýy qajet", - dedi Memleket basshysy.

QR Prezıdenti bul barlyq damyǵan elderdiń tájirıbesi ekendigin atap ótti.

"Muny burynnan aıtyp kelemiz. Medıtsınany adamǵa bir qadam jerge deıin jaqyndatý qajet. Bul óte mańyzdy másele. Sol sebepti densaýlyq saqtaýdyń osy mindetterin júzege asyrý úshin shamamen 120 mlrd teńge bólýdi tapsyramyn. Men aıtqan tapsyrmalar oryndalsa, onda nátıjesinde jylyna shamamen 100 myń patsıenti bar 7 óńirdegi statsıonarlyq-medıtsınalyq kómek sapasy jaqsaratyn bolady", - dedi Elbasy.