7 óńirdegi ınflıatsııa ortasha respýblıkalyq deńgeıden asyp ketti

ASTANA. QazAqparat - 2016 jyldyń basynan beri ınflıatsııa 5,6 paıyzdy qurady. Bul týraly búgin Úkimettiń selektorlyq rejımdegi otyrysynda elimizdiń 9 aıdaǵy áleýmettik-ekonomıkalyq damýy jaıynda baıandama jasaǵan Ulttyq ekonomıka mınıstri Qýandyq Bıshimbaev málim etti, dep habarlaıdy QazAqparat.

Onyń aıtýynsha, elimizde ınflıatsııalyq protsesterdiń báseńdeýi baıqalady. Máselen, ótken aıda ınflıatsııa 0,2 paıyzǵa deıin báseńdegen. 2016 jyldyń basynan bastap ınflıatsııa 5,6 paıyzdy 2015 jylǵy qańtar-qyrkúıeginde 2,9%) qurady. Azyq-túlik emes taýarlardyń 6,8 paıyzǵa qymbattaýy ınflıatsııaǵa 2,2 paıyzdyq  úles qosyp otyr.

«Azyq-túlik taýarlarynyń baǵasy 4,9, aqyly qyzmetter 5,3, onyń ishinde retteletin qyzmetter 7,6 paıyzǵa ósti. Óńirlik bóliniste 7 óńirde ınflıatsııanyń ortasha respýblıkalyq deńgeıden asyp ketýi baıqalady. Eń joǵary ınflıatsııa Mańǵystaý oblysynda 7,2 paıyz deńgeıinde, Astana qalasynda 6,6 jáne Ońtústik Qazaqstan oblysynda 6,4 paıyz deńgeıinde tirkeldi», - dedi Bıshimbaev.