7 myńnan astam jolaýshy Almaty áýejaıynan tyıym salynǵan zattardy ótkizbek boldy
ALMATY. QazAqparat - Almaty áýejaıynda 31 jastaǵy jolaýshydan tintý kezinde 7,62 kalıbrli patron tabyldy. Bul týraly Almaty áýejaıynyń baspasóz qyzmeti Feısbýkte málim etti, dep habarlaıdy QazAqparat tilshisi.
«Óskemenge baǵyt alǵan 31 jastaǵy er adamnyń qol júgin tekserý kezinde 7,62 kalıbrli patron tabyldy. Bul zat áskerı nemese azamattyq maqsatta avtomattan atý úshin paıdalanylady. Aıta ketý kerek, 2019 jyldyń qańtarynda jolaýshylardan 8 elektroshoker, 2 sýyq qarý, 12 oq-dári tárkilengen», - dedi baspasóz qyzmetinen.
Al byltyr Almaty áýejaıynyń áýe qaýipsizdigi qyzmetiniń ókilderi bortqa tyıym salynǵan zattardy alyp ótpek bolǵan 7802 jolaýshyny toqtatty.
192 is materıaly sotqa berildi.
Jolaýshylardyń bagajynan nemese qol júginen 188 qarý, teleskopııalyq dýbınkalar (5), elektroshokerler (163), 370 oq-dárilik zattar tárkilendi.
Odan bólek Almaty áýejaıynan resmı túrde 5045 qarý men 193 502 oq-dári ótkizilgen.
«Kóptegen jolaýshylar ańshy quraldaryn tasymaldaý erejesin bilmeıdi. Adamdar bizdiń erejemen tyıym salynbaǵan kez-kelgen qarýdy alyp óte alady. Onymen qosa 5 keli oq-dári alyp ótýge ruqsat etilgen. Ańshylyq bıleti bar, ańshylyq qarýdy alyp júrýge ruqsaty bar jolaýshylardyń qarýy ushý kezinde bólek konteınerde saqtalady. Jolaýshylar ony áýejaıǵa jetkende bir-aq alady», - dedi áýejaıdyń baspasóz qyzmeti.
