7 myńǵa jýyq aýyl turǵyndary áleýmettik tólemder taǵaıyndaý jóninde keńes aldy
Bul týraly QR Densaýlyq saqtaý jáne áleýmettik damý mınıstrliginiń baspasóz qyzmetinen habarlady.
Aýyl turǵyndaryna memlekettik qyzmetterdi kórsetý úshin atalǵan uıymdardyń 830 qyzmetkeri jumyldyryldy. Atqarylǵan jumys qorytyndysynda júgingen 6890 azamattyń 4164-i túrli áleýmettik tólemderdi rásimdeý boıynsha keńes aldy, 1549 adamnan derektemelerdi ózgertý jóninde ótinishter qabyldandy, 1177 aýyl turǵyny zeınetaqy jáne járdemaqy taǵaıyndaýǵa qujattaryn tapsyrdy.
Aǵymdaǵy jylǵy 16 naýryz ben 8 maýsym aralyǵynda jumyldyrý toptary elimizdiń barlyq óńirlerinde 956 shalǵaı aýyldyq okrýgti qamtyp, olarǵa 2260 ret, onyń ishinde jospardan tys 12 ret bardy.
Zeınetaqy jáne járdemaqy taǵaıyndaý jónindegi barlyq ótinishter boıynsha elektrondyq is maketteri jasaqtalyp, ókiletti organnyń qaraýyna jiberildi. Aǵymdaǵy jylǵy 8 maýsymdaǵy jaǵdaı boıynsha 1109 ótinish berýshige zeınetaqy jáne járdemaqy taǵaıyndaldy. Zeınetkerlik kýálikter jáne habarlamalar azamattarǵa jumyldyrý toptarynyń kelesi saparlarynda jetkiziletin bolady.
Jumyldyrý toptarynyń jumysy pılotty rejımde jyldyń sońyna deıin sozylady. Turǵylyqty jeri boıynsha qyzmet alýshylarǵa qyzmet kórsetý (qujattardy qabyldaý jáne shot ashý) memlekettik qyzmetti alý ýaqytyn jáne shyǵyndardy tómendetýdi, qolaılylyqty, ońaılatylǵan tártipti qamtamasyz etedi.
Buǵan deıin habarlanǵandaı, aǵymdaǵy jylǵy 12 naýryzda «Zeınetaqy tóleý jónindegi memlekettik ortalyq» RMQK, «Qazposhta» AQ jáne «Halyqqa qyzmet kórsetý ortalyǵy» RMK arasynda Ózara túsinistik jáne yntymaqtastyq týraly memorandýmǵa qol qoıyldy. Atalǵan qujat «Áleýmettik-eńbek salasyndaǵy memlekettik qyzmetterdi ońtaılandyrý jáne avtomattandyrý máseleleri jónindegi Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» QR Zańyn iske asyrýǵa baǵyttalǵan.