«7 mınýtta tonap ketti» - Frantsııanyń ІІM basshysy Lývrdaǵy atyshýly urlyq týraly

ASTANA. KAZINFORM — Lývr murajaıyndaǵy Apollon galereıasynyń tonalýy frantsýzdardyń jappaı narazylyǵyn týdyrdy. Polıtsııa men el basshylyǵy qylmyskerlerdi anyqtap, tonalǵan jádigerlerdi tabýǵa ýáde berdi. Kazinform agenttiginiń menshikti tilshisi oqyrman nazaryna atyshýly isti tergeý qalaı júrip jatqany jaıly sholý usynady.

Sońǵy málimetter...

Tonaýshylar tórt adam bolǵan. Olardyń ekeýi Lývrdyń bir jaq janyna toqtaǵan avtotıegishte bolǵan. Onyń bireýi sary, ekinshisi qyzǵylt sary tústi jılet kıgen, al qalǵan eki qylmysker T-max skýterimen kelip toqtaǵan. Jumysshylardyń keıpine enip, krannyń tumsyǵyn ekinshi qabattaǵy terezege tirep qoıǵan da, sol aýmaqty qurylys konýstarymen qorshap tastaǵan.

Parıj prokýrory Laýra Bekkonyń aıtýynsha, odan keıin eki qaraqshy terezeni syndyryp, murajaıǵa engen. Sodan soń kúzetshilerge qoqan-loqy kórsetip, dabyl júıesin óshirgen.

Qylmyskerler birneshe zergerlik buıymdy urlaǵan. Keıin olar júk lıftisimen tómen túsip, jergilikti ýaqyt boıynsha 9:38-de skýtermen A6 avtomagıstraline qaraı taıyp turǵan.

— Olar óte shapshań áreket etti, urlyq jeti mınýtta jasaldy, — dedi Іshki ister mınıstri Loran Nýnes France Inter-diń jeksenbi kúngi efırinde.

Jedel tergeý barysynda polıtsııa oqıǵa ornynan eki úshkir tegisteýish mashına, dánekerleıtin lampa, benzın, qolǵap, ratsııa, kórpe jáne Evgenıı patshaıymnyń zaqymdalǵan tájin tapty. Biraz ýaqyttan keıin qylmyskerler ózderin jumysshy retinde kórsetý úshin qoldanǵan sary jılet tabyldy, ol urylar qashqan kezde túsip qalǵan kórinedi.

Laýra Bekkonyń pikirinshe, bul faktiler olardyń «jaqsy daıyndalǵanyn» jáne «tonaýdyń aldyn ala uıymdastyrylǵanyn» kórsetedi.

— Biz bul tonaýdy uıymdasqan, aýyr qylmys dep esepteımiz, qaýipsizdik kameralarynan jazbalar bar, — dedi Parıj prokýrory.

Ol sondaı-aq ózi «kommandos» dep ataıtyn tórt qylmyskerdiń áli de bostandyqta júrgenin aıtty.

Ne urlandy

Marııa-Amelı men Gortenzııa patshaıymynyń bezendirilgen dıademasynyń (táji) elementteri;

Marııa-Amelı men Gortenzııa patshaıymy áshekeı buıymdary jınaǵynyń ishindegi jaqut alqa;

Marııa-Amelı men Gortenzııa patshaıymynyń jaquttan jasalǵan garnıtýrasynan syrǵalar;

Marı-Lýıza garnıtýrasynan jasalǵan zúbarjat (ızýmrýd) alqasy;

Marı-Lýıza jıyntyǵynan jasalǵan zúbarjat syrǵalary;

Qasıetti túıreýish dep atalatyn tanamonshaq;

Imperatrıtsa Evgenııdiń tıarasy;

Imperatrıtsa Evgenııdiń túıreýishi (tanamonshaǵy).

Osy 8 zergerlik buıymmen qosa qaraqshylar III Napoleonnyń áıeliniń tájin de urlap ketti. Lývr saıtynda jarııalaǵan sıpattamaǵa sáıkes, bul táj 1354 gaýhar taspen jáne 56 zúbarjatpen bezendirilgen, biraq ol murajaıdyń syrtynda zaqymdalǵan kúıinde tabylǵan.

— Lývr — bizdiń mádenıetimizdiń sımvoly. Urylar Frantsııa patshalarynyń zergerlik buıymyn qoldy qyldy, bul qylmysty «bizdiń elimizdi masqaralaý» dep qabyldaımyz, — dedi X jelisinde ulttyq birlestiktiń prezıdenti Djordan Bardella.

Buǵan deıin Napoleonnyń áshekeıleri qoldy bolǵanyn habarlaǵan edik.

 Frantsııa prezıdenti Emmanýel Makron urlanǵan buıymdardy qaıtarýǵa sóz berdi.