7 myńnan astam qyzylordalyq oqýshy qala syrtyndaǵy lagerlerde demalady
QYZYLORDA. KAZINFORM – Bıyl 1-10 synypty aıaqtaıtyn 175,5 myńnan astam qyzylordalyq oqýshynyń 98%-y jazǵy demalyspen qamtylady. Bul týraly Qyzylorda oblystyq bilim basqarmasy habarlady.
Mektepter janyndaǵy 556 lagerde 160 myńǵa jýyq, 95 kıiz úıli etnolager, 43 shatyrly lagerde 6 myńnan astam, qala syrtyndaǵy 8 lager men ortalyqtarda 7 aýysymda 7 myńnan astam bala kanıkýlyn ótkizedi.
– «Qazaqstan halqyna» qorynyń demeýshiligimen 500 oqýshy Túrkistan oblysy Tóle bı aýdanynyń Birkólik eldi mekenindegi «Qýanysh» lagerine, jergilikti demeýshiler men kásipodaq esebinen 4,5 myńǵa jýyq oqýshy ózge aımaqtardaǵy lagerlerge barady. Respýblıkalyq «Baldáýren» oqý-saýyqtyrý ortalyǵynda 200-den astam oqýshy tynyǵady. Mektep, kolledjderden bólek balalar men jasóspirimderge arnalǵan «Syr juldyzdary» shyǵarmashylyq-ınnovatsııalyq akademııasy, Oqýshylar saraıy sekildi qosymsha bilim berý uıymdarynda shyǵarmashylyq, óner, ınjenerlik baǵyttaǵy úıirmeler jumys isteıdi, - dedi basqarma basshysy Asqarbek Esjanov.
Oqýshylar úshin sondaı-aq elimizdiń basqa qalalaryna jáne jergilikti tarıhı oryndarǵa, jańa nysandarǵa, Baıqońyr ǵarysh aılaǵyna, Qazaly aýdanyndaǵy ortaǵasyrlyq Jankent, Jańaqorǵan aýdanyndaǵy ejelgi Saýran, Syǵanaq qalashyqtaryna, Qarmaqshydaǵy Qorqyt ata eskertkishine, Túrkistan oblysynyń kıeli oryndaryna ekskýrsııa, týr uıymdastyrylady.
Eske salsaq, jazǵy demalysta elimizdegi lagerlerde 3,1 mln balany, onyń ishinde áleýmettik osal toptaǵy 500 myńnan astam balany qamtý josparlanǵan.