7 myńnan astam adam júrgizýshi kýáligin onlaın rejımde aýystyrdy
ASTANA. KAZINFORM - Qazaqstandyqtar júrgizýshi kýáligin eGov Mobile mobıldi qosymshasy arqyly onlaın aýystyra alady.
«Ulttyq aqparattyq tehnologııalar» AQ qoǵammen baılanys basqarmasynyń habarlaýynsha, bul qyzmet qujattyń qoldanylý merzimi aıaqtalǵan, qujat joǵalǵan, urlanǵan nemese tólqujat derekteri ózgergen jaǵdaıda kórsetiledi. Qyzmet iske qosylǵannan beri ony 7 000-nan astam adam paıdalandy.
Basty erekshelik – buryn berilgen jeke kýálik nemese tólqujattaǵy fotosýretti paıdalaný múmkindigi. Negizgi shart – fotosýreti bar qujat sońǵy úsh jyl ishinde shyǵarylǵan bolýy tıis.
Qyzmetti paıdalaný úshin:
- eGov Mobile mobıldi qosymshasyna avtorızatsııadan ótip, «Qyzmetter» bólimine ótý qajet
- «Júrgizýshi jáne kólik» bóliminen «Júrgizýshi kýáligin berý» qyzmetin tańdaý
- daıyn qujatty alatyn halyqqa qyzmet kórsetý ortalyǵyn (HQKO) tańdaý
- júrgizýshi kýáligin aýystyrý sebebin kórsetý jáne fotosýretti júkteý
- qoltańba úlgisin júktep, baılanys nómirin engizý kerek
- memlekettik bajdy tóleý qajet (4 915 teńge)
- ótinimdi Face/Touch ID kómegimen rastaý qajet
- qyzmet nátıjesi «Habarlamalar» bóliminde qoljetimdi bolady.
Ótinim maquldanǵannan keıin júrgizýshi kýáligin tańdaǵan HQKO-dan jeke kýálikti jáne qoldanystaǵy júrgizýshi kýáligin usyný arqyly alýǵa bolady. Jańa qujat berilgenge deıin burynǵy kýálik jaramdy bolyp qala beredi (eger onyń merzimi aıaqtalmasa).
Qyzmet túrin eGov.kz portaly arqyly da paıdalanýǵa bolady.
- Qyzmet QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń Memlekettik kórsetiletin qyzmetter komıteti, «Ulttyq aqparattyq tehnologııalar» AQ jáne QR Іshki ister mınıstrliginiń birlesken jumysynyń nátıjesinde iske qosyldy, - delingen habarlamada.
Osyǵan deıin endi júrgizýshi kýáligin alý úshin emtıhanǵa tek «HQKO» qosymshasynan jazylý kerektigi týraly habarladyq.