7 myńnan asa qazaqstandyq júrgizýshi kýáligin eki batyrmany basý arqyly aýystyrdy

ASTANA. KAZINFORM — Elektrondyq úkimet servısteri qazaqstandyqtardyń kúndelikti ómiriniń ajyramas bóligine aınaldy. Bul týraly QR tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev baıandady.

— Búginde memlekettik qyzmetterdiń 92%-y onlaın formatta qoljetimdi, al smartfondandyrý deńgeıi 90%-ǵa jetti. 2024 jyly 341 mıllıon qyzmet kórsetildi, onyń 91%-y elektrondy túrde usynyldy. Qyzmetterdiń basym bóligi proaktıvti túrde ótinishsiz kórsetilip jatyr, Halyqqa qyzmet kórsetý ortalyǵyna barmaı-aq júzege asady, — dedi mınıstr Úkimettiń búgingi otyrysynda.

Sala mınıstri eGov arqyly onlaın qyzmet kórsetýge monopolııany joıyp, negizgi qyzmetterdi tanymal fınteh platformalarǵa shyǵarǵanyn da eske saldy. Bul halyqtyń tsıfrlyq servısterge qoljetimdiligin arttyrdy.

— Qazaqstandyqtar QR-qoltańba men bıometrııalyq sáıkestendirý tehnologııalaryn meńgerip, kúndelikti qoldanyp júr. Tsıfrlyq qujattar servısi erekshe tanymal boldy — bir jylda 292 mıllıon ret qoldanyldy. eGov Mobile qosymshasy jaı ǵana portal emes, azamattardyń kúndelikti ómirindegi naǵyz tsıfrlyq kómekshisi boldy. Tek ótken jyly qazaqstandyqtarǵa qujattyń jaramdylyq merzimi, mektepke qabyldaý, járdemaqy taǵaıyndaý, grant berý, týǵan kún jáne úılený toıy týraly quttyqtaýlarǵa deıin 36 mıllıon habarlama jiberildi. Ótken jyly «Ulttyq qor — balalarǵa», «Stop-kredıt», 4 «Kólik ıelený tarıhy», «Qumar oıyndarǵa qatysýdan erikti túrde bas tartý» sekildi tanymal servıster iske qosyldy. Mysaly, qazir júrgizýshi kýáligin eki batyrmany basý arqyly aýystyrýǵa bolady — bul servısti 7 myńnan astam qazaqstandyqtar paıdalandy, — dep tolyqtyrdy J. Mádıev.

Eske sala keteıik, Astana men Almaty áýejaıynan bıometrııalyq sáıkestendirý arqyly ushýǵa bolady.