7 myńǵa jýyq kitap oqyǵan elordalyq zeınetker jastarǵa keńes berdi
ASTANA. KAZINFORM – Astanada «Kitap oqıtyn ult» jobasy aıasynda aǵa býyn ókilderi bas qosyp, ádebıettiń adam ómirindegi orny, kitap oqýdyń paıdasy jáne keıingi urpaqtyń kitapqa qyzyǵýshylyǵyn arttyrý máselelerin talqylady, dep habarlaıdy Astana qalasy ákimdiginiń resmı saıty.
Kezdesýge qatysqan qarııalar kitap oqýǵa qalaı qyzyqqany, súıikti shyǵarmalary men jınaǵan kitap qorlary týraly áńgimelep, jastardy kitappen dos bolýǵa shaqyrdy.
Nura aýdanyndaǵy Belsendi uzaq ómir súrý ortalyǵynyń múshesi Aldanysh Nurpeıisov uzaq jyl boıy kitap oqýdy nasıhattap keledi. Onyń aıtýynsha, kitap bala kezinen ómiriniń ajyramas bóligine aınalǵan.
– Bizdiń «Ulaǵat» atty ádebı-shyǵarmashylyq uıymymyz bar. Onda qazaqtyń Alash zııalylary men jazýshylarynyń ómiri men shyǵarmashylyǵyn nasıhattaýdy kózdeımiz. Ózim bala kúnimnen ósken jerimdegi kitaphananyń kitaptaryn taýysa oqydym. Onyń ómirimde óte kóp paıdasy boldy. Kitap – tárbıeshi. Kitap – bilim. Kitapta adamǵa qajetti dúnıeniń bári bar. Qazir de kitap oqýdy toqtatqan emespin. Ózimnen keıingi urpaqqa da kitap oqýdy nasıhattaýdy jalǵastyra beremin, – dedi Aldanysh Nurpeıisov.
Esil aýdanyndaǵy Belsendi uzaq ómir súrý ortalyǵynyń múshesi Málıka Nuralıevanyń jeke qorynda 6-7 myń kitap bar. Onyń aıtýynsha, bul kitaptardyń barlyǵyn derlik oqyp shyqqan.
Ol jınaǵan kitaptaryn jeke qorynda ǵana saqtamaı, mektepter men joǵary oqý oryndaryna da tabystap keledi.
– Meniń qorymdaǵy 6-7 myń kitapty tolyq oqydym dep aıta alamyn. Kitap oqıtyn qaýymdastyqtarǵa balalarymdy da jiberemin. Olar da kitap oqyp, óz bolmysyn qalyptastyryp jatyr. Jıǵan-tergen kitaptarymdy mektepter men joǵary oqý oryndaryna da tabystadym. Kitap oqyǵan adamnyń zeıini men oılaý qabileti erekshe bolady. Sondyqtan kitap oqýdy bárimiz qolǵa alýymyz kerek, – dedi Málıka Nuralıeva.
Al Raıhan Jumáliqyzynyń kitapqa qyzyǵýshylyǵy bala kezinen otbasynda qalyptasqan. Onyń aıtýynsha, úıde kitap oqý jáne shyǵarmalardy birge talqylaý dástúri bolǵan.
– Meniń bala kezimnen otbasym kitap oqýǵa, shyǵarmalardy talqylaýǵa beıim boldy. Aǵamnyń tárbıesi meniń kitapqa degen qyzyǵýshylyǵymdy oıatty. «Abaı jolynyń» bizdiń tarıhymyz ben tanymymyzda shoqtyǵy bıik. Ony árbir qazaq oqýy tıis. Men de ony oqýdan jalyqpaımyn. Astana qalasynda kitap oqıtyn jastar kóp. Bizdi sol qýantady, – dedi ol.
Kezdesýde kitaptyń bilim men tárbıe kózi ǵana emes, tarıhı jadyny saqtaıtyn qundylyq ekenine de nazar aýdaryldy.
Qoljazbalar jáne sırek kitaptar ulttyq ortalyǵynyń Kórme uıymdastyrý bóliminiń basshysy Anar Baımaǵambetova kópshilikke usynylǵan sırek jazba muralar týraly aıtyp berdi.
– Bul jazbalar – faksımıle nusqalar. Túpnusqalardyń barlyǵy saqtalǵan. Olardy kóshpeli kórme retinde alyp júremiz. Kórmege Qarahan túrki qaǵanaty kezeńinen Qazaq handyǵyna deıingi qundy jazbalar, sondaı-aq 1929 jyldan bastap tóte, latyn jáne kırıll jazýlaryndaǵy muralar qoıylǵan, – dedi Anar Baımaǵambetova.
Kezdesýge qatysýshylar kitapty tárbıe men bilimniń kózi, adamnyń zeıini men oılaý qabiletin damytatyn qural retinde baǵalady. Al sırek kitaptar men qoljazbalardyń ulttyń tarıhı jadyn saqtaýdaǵy mańyzy atap ótildi.
«Kitap oqıtyn ult» jobasy aıasyndaǵy kezdesýler urpaqtar sabaqtastyǵyn nyǵaıtyp, jastardyń ádebıetke, ulttyq mura men tarıhqa qyzyǵýshylyǵyn arttyrýdy kózdeıdi.
Aıta keteıik, elordadaǵy 9-synyp oqýshysy Veronıka Anısımova Astananyń № 8 balalar kitaphanasyndaǵy 800 kitapty oqyp, ondaǵy kitap qorynyń basym bóligin paraqtaǵan.
