7 myń tonnadan astam saz balshyqty zańsyz óndirgen kompanııa basshylyǵy tergelip jatyr
ASTANA. KAZINFORM — Qarjylyq monıtorıng agenttiginiń Qostanaı oblysy boıynsha departamenti «OGNEÝPORSNAB» JShS laýazymdy tulǵalaryna qatysty asa iri kólemde tehnogendik mıneraldyq túzilimderdi jymqyrý faktisi boıynsha tergeý júrgizip jatyr.
Tergeý málimetinshe, kompanııa bir jyl boıy Arqalyq ken ornynan 7 myń tonnadan astam otqa tózimdi saz balshyqty zańsyz óndirip, satqan.
Agenttik tehnogendik mıneraldyq túzilimderdi óz betinshe óndirý men jymqyrýdy azamattyq-quqyqtyq daý emes, Qazaqstan halqynyń menshigi bolyp tabylatyn tabıǵı resýrstardy urlaý, sondaı-aq memlekettiń ekonomıkalyq jáne ekologııalyq múddelerine zııan keltirýge ákeletin qylmystyq áreket dep atap ótti.
JShS dırektorynan advokattyń qatysýymen jaýap alynǵan. Onyń quqyqtary tolyq saqtalyp, eshqandaı májbúrleý sharalary qoldanylmaǵany habarlandy.
QR Qylmystyq-protsessýaldyq kodeksiniń 201-babyna sáıkes ózge málimetter jarııa etýge jatpaıdy.
Qarjylyq monıtorıng agenttigi qoǵamdyq keńistikte shyndyqqa sáıkes kelmeıtin aqparat taratý resmı tergeýge kedergi keltiretinin de eskertti.
Aıta keteıik, Arqalyqta aqbókenniń ushasyn birneshe ret satqan er adam sottaldy.