7 myń bala qant dıabetine shaldyqqan: Prezıdent fast-fýd jarnamasyn muqııat zerdeleýdi tapsyrdy
ASTANA. KAZINFORM — Memleket basshysy Qasym-Jomart Toqaev balalarǵa baǵyttalǵan fast-fýdtyń agressıvti jarnamasyna alańdaýshylyq bildirip, Úkimetke onyń densaýlyqqa áserin jan-jaqty zertteýdi tapsyrdy. Prezıdent maı, qant jáne tuzy joǵary ónimder jarnamasyn shekteý tájirıbesin qarastyrýdy usyndy.
Respýblıkalyq Tamyz konferentsııasynda Prezıdent fast-fýdtyń agressıvti jarnamasy qaptap ketkenin basa aıtty.
Tez iship-jelinetin taǵam zııandy ádet qalyptastyrady, densaýlyq saqtaý júıesine salmaq túsiredi, elimizdiń eńbek kúshi áleýetine teris áser etedi.
— Dárigerlerdiń baqylaýynda qant dıabetine shaldyqqan 7 myńǵa jýyq bala bar. Olardyń sany kóbeımese, azaıyp jatqan joq. Kóptegen el quramynda maı, qant jáne tuz mólsheri joǵary ónimderdiń jarnamasyna tyıym salady nemese shekteý qoıady, — dep atap ótti Qasym-Jomart Toqaev.
Memleket basshysy bul óte kúrdeli másele ekenin aıtyp, túrli shetin tustary, pikirtalastarǵa negiz bolǵan medıtsınalyq, tipti saıası astary bar ekenin de jasyrmady.
— Degenmen Úkimet, eń aldymen, balalarymyzdyń saýlyǵyn oılap, atalǵan problemanyń uńǵyl-shuńǵylyn muqııat zerdeleýi kerek, — dedi Qasym-Jomart Toqaev.
Buǵan deıin Memleket basshysy 16 jasqa deıin áleýmettik jelige tyıym salyp, mindetti SIM-karta engizýdi Quryltaıda qaraýdy usynǵan edi.
